Qazaqstannyń Tuńǵysh Prezidenti Nursultan Nazarbaev Mańǵystaý oblysyna jumys saparymen bardy. Elbasy Aqtaý qalasynda halyqaralyq týristik habtyń tusaýkeserine qatysty.
Týristik habty damytý jobasy Kaspii teńizi jaǵalaýyn qamtymaq. N.Nazarbaev otandyq týrizm salasyn órkendetýdiń mańyzdylyǵyna toqtala kele, Qazaqstan biregei tabiǵatqa, sonymen qatar tarihi-mádeni mańyzdaǵy kieli oryndarǵa, Uly Jibek jolynyń nysandaryna, qundy arheologiialyq eskertkishterge ie ekenin atap ótti. Bul elimizde uiymdasqan demalystyń kez kelgen túrin órge bastyrýǵa múmkindik beredi.
– Týrizmdi damytý memlekettik baǵdarlamasy aiasynda týristik áleýetke taldaý júrgizildi jáne barynsha kórnekti nysandar men mańyzdy óńirler anyqtaldy. Olardy irikteý kezinde saiahatshylar úshin «magnit» qyzmetin atqarar áleýeti basty shart boldy. Osy baǵyttaǵy jetekshi óńirler qataryna Alakól, Balqash kólderi, Shýchinsk-Býrabai kýrorttyq aimaǵy, Túrkistan qalasy jáne basqasy qatarynda Mańǵystaý da kirip otyr, – dedi Tuńǵysh Prezident.
Kaspii teńizi jaǵasynda memleketimizde tuńǵysh ret «barlyǵy qosylǵan» kontseptsiiasy negizinde otbasylyq demalysqa arnalǵan qonaqúi keshenin turǵyzǵan sheteldik investordyń kelýi – osy óńirdegi eleýli oqiǵaǵa ainaldy. Rixos qonaqúiler jelisiniń basqarma tóraǵasy F.Tamindje Rixos Water World Aktau atty liýks synybyndaǵy bes juldyzdy kýrorttyq oteldi damytý jobasyn tanystyrdy.
Sondai-aq qazaqstandyq jáne sheteldik investorlardy tartý arqyly týristik klasterdi ary qarai keńeitýdiń perspektivasy týraly áńgimeledi. Elbasynyń bailamynsha, bul – Kaspiide keń aýqymdy halyqaralyq týristik habty qurý jolynda jasalǵan tek birinshi qadam. Onda endi qazaqstandyqtar da, sonymen birge sheteldik qonaqtar da joǵary dárejede demala alady.
Buǵan qosa, N.Nazarbaev teńiz jaǵalaýyndaǵy kýrorttyq aimaǵymyz jańa jumys oryndaryn ashatynyna basa mán berdi. Is-shara barysynda óńirde osy klasterdi damytý shamamen 50 myń jumys ornyn qurýǵa, sondai-aq jobany júzege asyrýǵa shamamen 2 milliard dollar tartýǵa múmkindik beretinine ekpin túsirildi.
– Táýelsizdik jyldary kóp is tyndyrdyq. Buryn álem bilmegen Qazaqstan búginde dúniejúzi kartasynda laiyqty oryn aldy. Biz jańa astanany turǵyzdyq. Ol ózge óńirler men oblys ortalyqtarynyń órkendeýine baǵdar berip keledi. Men alda barsha musylman úshin kieli meken – Túrkistan qalasyna saparlaýdy josparlap otyrmyn. Qazaq handyǵynyń osy baiyrǵy astanasy sońǵy ýaqytta keremet túrlendi jáne qazir úlken týristik áleýetke ie, – dedi Qazaqstannyń Tuńǵysh Prezidenti.
Ol týrizmdi nysanaly túrde órkendetýge baǵyttalǵan naqty qadamdar tek jekelegen óńirlerdiń ǵana emes, sondai-aq tutastai alǵanda búkil respýblikanyń ekonomikasyna zor tiimdilik, ońdy serpin beretinine nazar aýdartty.
Tusaýkeser sońynda Elbasy Rixos Water World Aktau qonaqúi keshenin aralap kórdi. Is-sharaǵa onlain-konferentsiia formatynda birqatar otandyq jáne sheteldik investorlar qatysty.
Olardyń arasynda ACCOR kompaniiasynyń Eýropa, Taiaý Shyǵys jáne Afrika óńirinde liýks synypty otelderdi damytý jónindegi birinshi vitse-prezidenti F.Boden, ÖG Holding basqarma tóraǵasy O.Giýr, otandyq BI Group qurylys holdinginiń direktorlar keńesiniń tóraǵasy A.Raqymbaev, «Bazis-A» korporatsiiasynyń direktorlar keńesiniń tóraǵasy A.Belovich boldy.
