Keshe Elbasy Nursultan Nazarbaev Parlament Májilisiniń jalpy otyrysyna qatysyp, Premer-Ministr K.Másimov bastaǵan Úkimettiń otstavkasyn qabyl alǵanyn taǵy da atap ótti.
Sondai-aq, Nursultan Nazarbaev K.Másimovke jáne Úkimet múshelerine atqarǵan jumystary úshin alǵys aityp, qyzmetterindegi kúrdeli kezeńge qaramastan alǵa qoiylǵan barlyq mindetterdiń oryndalǵanyn aitty.
Konstitýtsiianyń 44-babyna sáikes, Elbasy Parlament Májilisiniń qaraýyna Qazaqstan Respýblikasy Premer-Ministri laýazymyna Baqytjan Saǵyntaevtyń kandidatýrasyn usyndy.
– Oblystardyń, Astana men Almaty qalalary ákimderiniń qatysýymen ótken Úkimettiń búgingi keńeitilgen otyrysynda jańa ministrler kabineti sheshýge tiisti birqatar jańa mindetter qoidym. Álemdik ekonomika men saiasattyń qazirgi turaqsyzdyǵy jaǵdaiynda strategiialyq baǵdarlamalarymyzdy iske asyrýdy jalǵastyrý mańyzdy. Úkimetten barlyq baǵyt boiynsha naqty, saýatty jumys talap etiledi. Baqytjan Saǵyntaev jańa Úkimet jumysynyń sabaqtastyǵy men tiimdiligin saqtaý úshin laiyqty kandidatýra dep oilaimyn, – dedi Nursultan Nazarbaev.
Májilis depýtattary Premer-Ministr laýazymyna usynylǵan B.Saǵyntaevtyń kandidatýrasyn biraýyzdan maquldady.
B.Saǵyntaev kórsetilgen senim úshin alǵys bildirip, júktelgen mindetterdi oryndaýǵa bar kúsh-jigeri men bilimin jumsaitynyn aitty.
