Búgin «Nur Otan» partiiasynyń Ortalyq apparatynda Elbasymyz Nursultan Nazarbaevtyń ómiri týraly «Qurysh tulǵa» atty jańa tarihi-tanymdyq kitap kópshilikke tanystyryldy. Partiia bastamasymen jaryq kórgen týyndy Elbasynyń qairatker retinde qalyptasqan Temirtaý, Qaraǵandy kezeńin qamtidy. Kitap avtory – belgili pýblitsist, Qazaqstan Respýblikasy Prezidenti syilyǵynyń laýreaty, buǵan deiin «Elbasynyń altyn besigi» atty eńbegimen tanymal Aitbai Sáýlebek.
Avtor jańa týyndysynda sirek kezdesetin muraǵat qorlarynan alynyp, aqiqat-shyndyqqa negizdelgen tyń derekterdi, kýáger-tulǵalardyń júrekjardy sózderin, buryn jaryqqa shyqpaǵan túrli qujattardy usynady. Kitap derektemelik negizde jazylǵan. Ol «Ot-ózen», «Bilim belesinde», «Ósý jolynda», «Órleý», «Shyńdalý», «Partkom hatshysy» jáne «Samǵaý» degen jeti bólimnen turady. Atalmysh ásem bezendirilgen eńbekte Elbasynyń sirek kezdesetin sýretteri de berilgen.
Kitaptyń alǵysózin «Nur Otan» partiiasy Tóraǵasynyń Birinshi orynbasary Muhtar Qul-Muhammed jazǵan. Elbasynyń Qazaqstan tarihyndaǵy erekshe rólin aishyqtap, táýelsiz elimiz qol jetkizgen tabystaryna tereń taldaý jasaǵan M.Qul-Muhammed alǵysózin: «Elbasy ómiriniń ár kezeńin úlgi-ónege tutatyn qazaqstandyqtar bul kitapty qyzyǵa-qumarta oqityny anyq», – dep aiaqtaidy.
«Qurysh tulǵany» jazý úshin avtor Máskeý, Omby, Almaty, Qaraǵandy, Temirtaý jáne Astana qalalaryndaǵy Elbasymen birge eńbek etken, oqyǵan áriptes-dostarymen kezdesken. Olardyń birqatary – Qabidolla Sarekenov, Tóleýtai Súleimenov, Qýanysh Omashev, Ermek Tóleýbaev, Toqtarhan Ysqaqov – is-sharaǵa qatysyp jańa týyndynyń basty erekshelikteri men tarihi qundylyǵy týraly aitty. Sondai-aq, olar kitaptyń qalyń oqyrman qaýymnyń kóńilinen shyǵatynyna senim bildirdi.
Basylymdy «Delovoi mir» baspasy shyǵardy.
.jpeg)