Elordada álemge tanymal amerikalyq rejisser Oliver Stoýn prodiýserlik etken «Qazaq. Altyn adam tarihy» atty filmniń tusaýkeseri ótti, dep habarlaidy QazAqparat.
Filmniń alǵashqy kórsetilimin avtorlarmen birge Aqparat jáne qoǵamdyq damý ministri Aida Balaeva, Mádeniet jáne sport ministri Aqtoty Raiymqulova, «Qazaqfilm» aktsionerlik qoǵamynyń prezidenti Aqan Sataev, Májilis depýtattary jáne ózge de mádeniet pen óner maitalmandary tamashalady.
Kórsetilimnen keiin filmniń rejisseri Igor Lopatenok bastaǵan shyǵarmashylyq topqa qurmet kórsetildi.
«Bizdiń mádeni, rýhani ómirimizde taǵy bir úlken joba iske asty. Táýelsizdigimizdiń 30 jyldyǵy qarsańynda árqaisymyzdyń tarihymyz osy bir kishkentai týyndyda kóz aldymyzdan ótti. Sondyqtan mundai týyndylar kóp bolýy kerek dep oilaimyn. Óitkeni bul – tanymdyq, úlken material. Týyndy Elbasymyzdyń táýelsiz Qazaqstannyń ósip-órkendeýindegi, qalyptasyp nyǵaiýyndaǵy rólin asa aiqyn kórsetip ótti. Sondyqtan mundai týyndylardy tek ishki aýditoriiaǵa ǵana emes, shetelde nasihattap, kórsetý óte mańyzdy», - dedi Aqparat jáne qoǵamdyq damý ministri Aida Balaeva kórsetilimnen keiin.
Ministr táýelsiz Qazaqstannyń taǵdyrsheshti oqiǵalarǵa toly aýqymdy tarihynan film jinaqtap shyǵarý ońai bolmaǵanyn atady.
«Shyǵarmashylyq topqa osy eńbegi úshin alǵys aitqym keledi. Men bunyń óte aýqymdy material bolǵanyn, ony jinaqtaý óte qiynǵa túskenin bilemin. Óitkeni táýelsizdik jyldaryndaǵy árbir sátti, árbir oqiǵany boiynan ótkizip qabyldaǵan Tuńǵysh Prezidenttiń aýzynan shyqqan árbir málimet mańyzdy, qyzyqty boldy dep oilaimyn. Osynshama aýqymdy materialdyń arasynan tamasha film yqshamdap alyp shyǵý – úlken eńbek. Film óte sátti shyqqan. Sondyqtan avtorlaryna alǵysymdy jetkize otyryp, ári qarai da shyǵarmashylyq tabystarǵa jete berýdi tileimin», - dedi Aida Balaeva.
