ەلوردادا ەلەمگە تانىمال امەريكالىق رەجيسسەر وليۆەر ستوۋن پروديۋسەرلٸك ەتكەن «Qazaq. التىن ادام تاريحى» اتتى فيلمنٸڭ تۇساۋكەسەرٸ ٶتتٸ, دەپ حابارلايدى قازاقپارات.
فيلمنٸڭ العاشقى كٶرسەتٸلٸمٸن اۆتورلارمەن بٸرگە اقپارات جەنە قوعامدىق دامۋ مينيسترٸ ايدا بالاەۆا, مەدەنيەت جەنە سپورت مينيسترٸ اقتوتى رايىمقۇلوۆا, «قازاقفيلم» اكتسيونەرلٸك قوعامىنىڭ پرەزيدەنتٸ اقان ساتاەۆ, مەجٸلٸس دەپۋتاتتارى جەنە ٶزگە دە مەدەنيەت پەن ٶنەر مايتالماندارى تاماشالادى.
كٶرسەتٸلٸمنەن كەيٸن فيلمنٸڭ رەجيسسەرٸ يگور لوپاتەنوك باستاعان شىعارماشىلىق توپقا قۇرمەت كٶرسەتٸلدٸ.
«بٸزدٸڭ مەدەني, رۋحاني ٶمٸرٸمٸزدە تاعى بٸر ٷلكەن جوبا ٸسكە استى. تەۋەلسٸزدٸگٸمٸزدٸڭ 30 جىلدىعى قارساڭىندا ەرقايسىمىزدىڭ تاريحىمىز وسى بٸر كٸشكەنتاي تۋىندىدا كٶز الدىمىزدان ٶتتٸ. سوندىقتان مۇنداي تۋىندىلار كٶپ بولۋى كەرەك دەپ ويلايمىن. ٶيتكەنٸ بۇل – تانىمدىق, ٷلكەن ماتەريال. تۋىندى ەلباسىمىزدىڭ تەۋەلسٸز قازاقستاننىڭ ٶسٸپ-ٶركەندەۋٸندەگٸ, قالىپتاسىپ نىعايۋىنداعى رٶلٸن اسا ايقىن كٶرسەتٸپ ٶتتٸ. سوندىقتان مۇنداي تۋىندىلاردى تەك ٸشكٸ اۋديتوريياعا عانا ەمەس, شەتەلدە ناسيحاتتاپ, كٶرسەتۋ ٶتە ماڭىزدى», - دەدٸ اقپارات جەنە قوعامدىق دامۋ مينيسترٸ ايدا بالاەۆا كٶرسەتٸلٸمنەن كەيٸن.
مينيستر تەۋەلسٸز قازاقستاننىڭ تاعدىرشەشتٸ وقيعالارعا تولى اۋقىمدى تاريحىنان فيلم جيناقتاپ شىعارۋ وڭاي بولماعانىن اتادى.
«شىعارماشىلىق توپقا وسى ەڭبەگٸ ٷشٸن العىس ايتقىم كەلەدٸ. مەن بۇنىڭ ٶتە اۋقىمدى ماتەريال بولعانىن, ونى جيناقتاۋ ٶتە قيىنعا تٷسكەنٸن بٸلەمٸن. ٶيتكەنٸ تەۋەلسٸزدٸك جىلدارىنداعى ەربٸر سەتتٸ, ەربٸر وقيعانى بويىنان ٶتكٸزٸپ قابىلداعان تۇڭعىش پرەزيدەنتتٸڭ اۋزىنان شىققان ەربٸر مەلٸمەت ماڭىزدى, قىزىقتى بولدى دەپ ويلايمىن. وسىنشاما اۋقىمدى ماتەريالدىڭ اراسىنان تاماشا فيلم ىقشامداپ الىپ شىعۋ – ٷلكەن ەڭبەك. فيلم ٶتە سەتتٸ شىققان. سوندىقتان اۆتورلارىنا العىسىمدى جەتكٸزە وتىرىپ, ەرٸ قاراي دا شىعارماشىلىق تابىستارعا جەتە بەرۋدٸ تٸلەيمٸن», - دەدٸ ايدا بالاەۆا.
