Nursultan Nazarbaev «Jas sarbaz» balalar men jasóspirimder áskeri-patriottyq qozǵalysy» respýblikalyq qoǵamdyq birlestiginiń tárbielenýshilerimen kezdesti, dep habarlaidy "Ult aqparat" Aqordaǵa silteme jasap.
Memleket basshysy ulttyq áskeri-patriottyq ortalyqqa baryp, «Otan, Elbasy, Jas sarbaz» atty merekelik is-sharaǵa qatysty, sondai-aq balalar men jasóspirimderdiń áskeri-patriottyq qozǵalysynyń tárbielenýshilerimen kezdesti.
Elbasy is-shara bastalar aldynda áskeri-patriottyq ortalyqtyń mýzeiindegi ekspozitsiialarmen tanysty. Onda Qazaqstan armiiasyna arnalǵan áskeri sýretshiler stýdiiasynyń týyndylary men «Orbulaq shaiqasynyń» dioramasy qoiylǵan, sonymen qatar 3D-mapping shoý tehnologiiasyn qoldaný arqyly proektsiialyq kórme uiymdastyrylǵan.
Qazaqstan Prezidenti sharaǵa qatysýshylardyń bárin óskeleń urpaqty otanshyldyqqa tárbieleitin «Jas sarbaz» qozǵalysynyń qurylýymen quttyqtady. Osyǵan orai, Memleket basshysy ulttyq rýhty qalyptastyryp, el tarihyn tereń zertteýdiń mańyzdylyǵyn airyqsha atap ótti.
– Jaqynda jariialanǵan Joldaýdaǵy mańyzdy máselelerdiń biri – patriottyq tárbie berý isi. Eger biz Otanymyzdy qorǵai almasaq, onda táýelsizdiktiń 27 jyly ishinde atqarǵan barlyq jumysymyzdyń máni joǵalady, – dedi Nursultan Nazarbaev.
Elbasy búginde memleket tarapynan atqarylyp jatqan sharalardyń bári keler urpaq úshin qolaily jaǵdai jasaýǵa baǵyttalǵanyn aitty.
– Osynyń bári jastarymyz – bizdiń bolashaǵymyz úshin atqarýda. Bul jumystardyń bári sizderdiń turmystaryńyzdy qazirgiden de jaqsartyp, Qazaqstanymyzdy odan ári baiyta túsý úshin jasalýda, – dedi Memleket basshysy.
Nursultan Nazarbaev elimizdiń barlyq jastaryn «Jas sarbaz» qozǵalysyna múshe bolýǵa shaqyrdy.
– «Jas sarbaz» qozǵalysy elimizdiń barlyq óńirinde qurylýǵa tiis. Jastar osy qozǵalystyń qatarynan tabylýy qajet. Sondyqtan, dene shynyqtyrýmen ainalysyp, áskeri mamandyqtardy igergen jón. Bul uiym Qorǵanys ministrligimen birlesip, patriottar tárbieleý isine belsendi atsalysýy kerek. Sonda ǵana sizder halyqtyń tiregine ainalasyzdar, – dedi Qazaqstan Prezidenti.
Memleket basshysy «Uly dalanyń jeti qyry» atty maqalanyń Qazaqstandaǵy patriotizmdi kúsheitý isindegi erekshe mańyzy týraly aitty.
Nursultan Nazarbaev Qazaqstan qoǵamynyń gúldenýi úshin turaqtylyq pen ultaralyq kelisimdi saqtaýdyń mańyzdylyǵyn atap ótti.
– Elimizde kóptegen etnos ókilderi turady. Biz bárimiz de – Qazaqstan azamattarymyz. Bai tarihymyzdyń arqasynda tózimdilik pen qurmet sezimin boiymyzǵa sińirdik. Bul qundylyqtar Qazaqstandy biriktiredi, memleketti qýatty jáne syily memleketke ainaldyrady. Sondyqtan patriot bolý – barshamyzdyń paryzymyz, – dedi Qazaqstan Prezidenti.
Sońynda Memleket basshysy is-sharaǵa qatysýshylarǵa tabys tilep, jańa jetistikterge jetýge niettestik bildirdi.
.jpeg)