QR Tuńǵysh Prezidenti - Elbasy Nursultan Nazarbaev ózine jazylǵan hattar men telegrammalardy, áleýmettik jelide jariialanǵan jazbalardy oqyp shyǵady. Bul týraly QR Tuńǵysh Prezidentiniń baspasóz hatshysy Aidos Úkibai aitty, dep habarlaidy QazAqparat.
A. Úkibai Elbasy barlyq hatty oqýǵa úlgere me degen suraqqa jaýap bere otyryp: «Barlyq formatta jiberilgen hattar Elbasyǵa kelip túsedi. Árine, ólsheýsiz kóp hat keledi, mundai kólem buryn da bolǵan. Qyzmettik qujattardy qaraý arasyndaǵy úziliste Elbasy hattar men telegrammalardy, áleýmettik jelide jariialanǵan jazbalardy muqiiat oqyp shyǵady. Nursultan Nazarbaevqa jastardyń #ElbasymenBirge bastamasy unady dep aita alamyn. Qazaqstannyń túpkir-túpkirinen, alys jáne jaqyn shet elderden kelip túsken qoldaý sózderi Tuńǵysh Prezidentke kúsh-qýat berip jatyr», - dedi.
Sonymen birge, ol Elbasynyń shet memleketterde, alpaýyt saiasatkerler arasynda úlken bedelge ie ekenin atap ótti.
«Vladimir Pýtin hat arqyly da, telefon arqyly da jyly lebizin bildirdi. Rejep Erdoǵan, Elbasyna degen qurmetpen tilegin qazaq tilinde jazǵan Maik Pompeo, Ortalyq Aziia elderiniń basshylary, Úndistannyń Premer-Ministri Narendra Modi jáne ózge de memleket basshylary habarlasty. Kópshiligi úshin Nursultan Nazarbaev jaqsy dos, jahandyq deńgeidegi saiasatker úlgisi bolyp qala beredi. Ózim de birneshe ret baiqadym, kóptegen memleket basshylarymen kezdesýde Elbasy tilektes, senimdi qarym-qatynas qura aldy. Nursultan Nazarbaevtyń biregei kópqyrlylyǵy adamdardy ózine tartatyn erekshe qasietke ie. Qazir de oǵan qurǵaq keńselik hat emes, shynaiy alańdaýshylyq pen qamqorlyqqa toly joldaýlar kelýde», - dedi Aidos Úkibai.
Sonymen birge, spiker Nursultan Nazarbaevtyń atyna eńbek sińirgen óner qairatkerlerinen, JOO rektorlarynan, depýtattardan, qoǵam qairatkerlerinen jáne kóptegen eńbek ujymdarynan telegrammalar kelip jatqanyn aitty.
