Qazaqstannyń Tuńǵysh Prezidenti Nazarbaev Ýniversitetiniń úzdik túlekterine diplom tapsyrý saltanatty rásimine qatysty, dep habarlaidy "Ult aqparat" Aqordaǵa silteme jasap.
Saltanatty rásimde sóz sóilegen Elbasy barsha túlekterdi aitýly kúnmen quttyqtady.
Qazaqstannyń Tuńǵysh Prezidenti osyǵan deiin tórt jyl ishinde Ýniversitetti 2600-den astam stýdent bitirgenin aitty.
– Ýniversitet túlekteri – elimizde jáne shetelde suranysqa ie bolyp otyrǵan básekege qabiletti jas mamandar. Búgin Ýniversitetti bitirip jatqan 963 túlektiń 565-i bakalavriat baǵdarlamasy boiynsha, 378-i magistratýra jáne 20-y doktorantýra baǵdarlamasy boiynsha bilim aldy. Bakalavriat baǵdarlamasy boiynsha oqý bitirgenderdiń 40 paiyzdan astamy álemniń úzdik ýniversitetterinen shaqyrý alyp, oqýyn jalǵastyrdy, – dedi Elbasy.
Nursultan Nazarbaev stýdentterdiń ǵylymi-zertteý jumysynyń nátijeleri jáne qol jetkizgen jetistikterin atap ótti.
– Byltyr Ǵylym jáne tehnologiia mektebiniń stýdenttik komandasy Bostonda ótken iGEM gendik-injenerlik mashinalar halyqaralyq baiqaýynda altyn medal jeńip aldy. Ǵylymi ázirlemelerdi kommertsiialandyrýǵa qatysty iGEM jobasyn atap ótýge bolady, – dedi Qazaqstannyń Tuńǵysh Prezidenti.
Elbasy Ýniversitettiń joǵary bilikti jáne básekege qabiletti kadrlary Qazaqstannyń joǵary tehnologiialy indýstriiasyn damytýǵa zor úles qosyp otyrǵanyn aitty.
– 2019 jyl Jastar jyly bolyp jariialandy. Jastar – elimizdiń qazirgi álemdegi básekege qabilettiliginiń negizgi faktory. Qazaqstannyń bolashaǵy sizderge, sizderdiń bilimderińizge, kúsh-qýattaryńyz ben patriottyq sezimderińizge bailanysty. Sizder óz áleýetterińiz men múmkindikterińizdi tolyq iske asyrý úshi biz barlyq jaǵdaidy jasap otyrmyz, – dedi Nursultan Nazarbaev.
Qazaqstannyń Tuńǵysh Prezidenti «NU – Nazarbaev Ýniversiteti» brendi álemdik akademiialyq ortada ǵana emes, sonymen qatar memlekettik basqarý, biznes, meditsina, innovatsiia, IT-tehnologiia salasynda keńinen tanymal bolǵanyn aitty.
– Bul bastama Qazaqstanda ǵana emes, sondai-aq búkil postkeńestik keńistikte ozyq jobaǵa ainalyp, óz salasynda kósh bastady. Ýniversitet qysqa merzim ishinde joǵary bilikti kásibi kadrlar daiyndaityn, sondai-aq otandyq ǵylymi zertteýler men ázirlemelerdi damytatyn elimizdiń bedeldi oqý orny retinde qalyptasty. Bilim ordasynyń basty aktivi – onyń ziiatkerlik áleýeti sanalatyn adamdar – oqytýshylar, stýdentter, basqarýshy personal, – dedi Elbasy.
Nursultan Nazarbaev túlekterdi elimiz ben qoǵamymyzdy damytý isine belsene atsalysýǵa shaqyrdy.
– Sizder joǵary bilikti mamandar ǵana emes, sondai-aq, azamattyq jaýapkershilikti sezinetin qoǵamnyń belsendi músheleri bolýlaryńyz kerek. Oqýdy odan ári jalǵastyrý, el igiligi úshin eńbek etý, Qazaqstannyń atynan shetelde bolý nemese óz isińizdi bastaý siiaqty qandai da bir joldy tańdasańyzdar da sizderge aq jol tileimin, josparlaryńyz tabysty iske asa bersin, – dedi Qazaqstannyń Tuńǵysh Prezidenti.
.jpeg)