Nur-Sultan qalasynyń ákimdiginde «Elbasy medali» jobasyna qatysý talaptary túsindirildi, dep habarlaidy QazAqparat.
«2019 jyly QR Tuńǵysh Prezidenti - Elbasy belsendi jáne talantty jastardy qoldaý boiynsha «El úmiti» jalpyulttyq saiasatyn usyndy. Bul bastama aiasynda QR Tuńǵysh Prezidenti - Elbasy qory daryndy balalardy anyqtaityn «Qabilet», «Elbasy medali» syndy birneshe biregei jobany qolǵa aldy. «Elbasy medali» baǵdarlamasyna qatysý tártibi Úkimet qaýlysymen bekitilip, Tuńǵysh Prezident qorynyń qoldaýymen ótip jatyr. Onyń basty maqsaty - óskeleń urpaqty qoldaý jáne yntalandyrý», - dedi Nur-Sultan qalalyq Bilim basqarmasy basshysy Sholpan Qadyrova ákimdikte ótken baspasóz máslihatynda.
«Elbasy medali» jobasynda árbir qatysýshyǵa ózin-ózi damytý úshin jeti baǵyt usynylǵan: «Sport jáne dene shynyqtyrý», «Kitap oqý», «Daryn men daǵdy», «Ulttyq mura», «Eriktilik», «Týristik saiahattar» jáne «Eńbek tájiribesi». Baǵdarlamany ázirleýde úzdik álemdik tájiribe qoldanylǵan.
«Baiqaýǵa qatysýshylar jasy 14 pen 29 jas aralyǵynda bolý - baǵdarlamanyń negizgi shartynyń biri. Al olar qaida turyp jatyr, bilimi qandai, mamandyǵy ne, bul jaǵy mańyzdy emes. «Elbasy medalin» maqsatyna umtylǵan árbir qazaqstandyq jas býyn ielene alady. Baǵdarlamaǵa qatysý úshin me.fpp.kz onlain platformasyna tirkelip, usynylǵan «altyn», «kúmis» nemese «qola» baǵyttaryn tańdaý kerek. Sodan keiin ózińizge arnaiy bekitilgen tálimgerdiń kómegimen óz qalaýyńyzǵa sai is-sharalar men kesteni tańdap, jeke damý baǵdarlamasyn jasai alasyz. Múmkindigi shekteýli jandar da baǵdarlamaǵa qatysa alatyndai keste qurýǵa jaǵdai jasalady», - dedi spiker.
Onyń aitýynsha, baǵdarlama sheńberinde eriktilerdiń qyzmeti, Memleket basshysynyń Volonter jylynyń ashylýynda aitqan mindetterine sáikes bolady.
«Elbasy medali» jastardyń tek biliminiń jáne tabysynyń simvoly ǵana bolyp qalmaidy. Bolashaq mektep túlekteri úshin de eldegi JOO-larda bilimderin jalǵastyrýǵa baǵyttalǵan tyń qadam. Medal iegerleriniń upailary teń bolǵan jaǵdaida QR zańnamasynda belgilengen tártippen bilim grantyn jáne qala ákiminiń grantyn alýǵa tolyq quqyǵy bar. Árine, bul - jaǵymdyq jańalyq. Elordada da «Elbasy medali» baǵdarlamasyn damytýǵa barlyq sharalar qolǵa alyndy. Baǵyn synamaqqa umtylǵan jastar úshin ákimdikten qajetti qarajat bólindi. Nátijesinde, qalamyz boiynsha dál qazir 1351 adam baǵdarlamaǵa qatysýǵa ótinish bergen, olardyń qatary áli de artady», - dedi Sh. Qadyrova.
.jpeg)