Abaidyń «Jidebai-Bórili» memlekettik tarihi-mádeni jáne ádebi-memorialdyq qoryq-mýzeiiniń direktory Turdyqul Shańbai Elbasynyń Nursultan Nazarbaevtyń «Abai amanaty» atty maqalasyna qatysty pikir bildirdi, dep habarlaidy QazAqparat.
«Qazaqstan Respýblikasynyń Tuńǵysh Prezidenti-Elbasy Nursultan Nazarbaevtyń «Abai amanaty» maqalasyn úlken tebirenispen oqyp shyqtym. Birden mýzei qyzmetkerlerimen jinalyp fálsapalyq máni tereń maqala týraly oi bólistik. Tamyry tereń, kókjiegi kórkem maqalany Abai mýzeiiniń qýanyshy dep qabyldadyq. Onyń sebebi de joq emes. Bizdiń mýzeide táýelsizdik kezeńindegi abaitanýǵa arnalǵan arnaiy ekspozitsiia bar. Elbasynyń «Abai amanaty» maqalasy bizge jol kórsetti, osy baǵytty jarqyrata ashyp berdi. Sondyqtan biik parasatpen jazylǵan maqala – Abai mýzeiiniń óz qýanyshy», - dedi Turdyqul Shańbai.
Qoryq-mýzeiiniń direktory Elbasy osy maqalasynda atalǵan mýzei týraly arnaiy jyly lebiz bildirgenin atap ótti.
«Maqalada: «Abaidyń ómiri men shyǵarmashylyǵyn tutas qamtityn «Jidebai-Bórili» memlekettik tarihi-mádeni jáne ádebi-memorialdyq qoryq-mýzei quryldy. Jidebaida úsh júz alpys áýlieli meken Mańǵystaýdan ákelingen ulýtastardan aqshańqan kúmbezdi Abai-Shákárim kesenesi turǵyzylyp, onyń ashylý rásiminde bul orynnyń endi ár qazaq úshin rýhani Mekkege ainalǵanyn atap óttim», dep jazylǵan. Elbasynyń danalyqpen aitylǵan sózi aqiqatqa ainaldy. Abai mýzeii Qazaqstannan, shet elden qonaqtar arnaiy izdep keletin rýhani Mekkege ainalǵany ras. Elbasynyń osy maqalasy bizge qýanyshpen qatar, úlken jaýapkershilik júkteidi. Óitkeni tereń tanymmen jazylǵan maqalada Abai mýzeiiniń mazmunyn ashatyn oilar mol. Maqalada aitylǵan mol málimet mýzeidiń mazmunyn ashýǵa úlken aqylshy bolary anyq. Biz soǵan qýandyq», - deidi Turdyqul Shańbai.
