Qytai Halyq Respýblikasynyń Halyq jinalasy úiinde Qazaqstan Respýblikasynyń Tuńǵysh Prezidentin tatý kórshilik qarym-qatynasty ilgeriletýge jáne jan-jaqty strategiialyq seriktestikti damytýǵa qosqan zor úlesi úshin «Dostyq» ordenimen resmi marapattaý rásimi ótti, dep habarlaidy "Ult aqparat" Aqordaǵa silteme jasap.
– Men 1992 jyly diplomatiialyq qatynastar ornaǵan sátten bastap táýelsiz Qazaqstannyń Qytaimen yntymaqtastyǵyn damytý jáne nyǵaitý jolynda jumys istep kele jatqanymdy atap ótkim keledi. Sizderdiń memleketterińizben ózara senimge jáne tatý kórshilikke negizdelgen qatynastar ornatqanymyzǵa qýanyshtymyn. Bizdiń yntymaqtastyǵymyz úlgi tutarlyq. Elderimiz óńirde jáne jahandyq deńgeide beibitshilikti, traqtylyq pen ornyqty damýdy qamtamasyz etýge eleýli úles qosyp keledi, – dedi Elbasy.
Nursultan Nazarbaev «Bir beldeý, bir jol» bastamasyn iske asyrý úderisine jáne onyń jahandyq syn-qaterlerge tótep berý isindegi mańyzdylyǵyna toqtaldy.
– Qysqa merzim ishinde «Bir beldeý, bir jol» bastamasy álemdik tabysty jobalar qataryna endi. Si Tszinpin myrzanyń bárimizdi birigýge bastaityn damý ideiasy búgingi syn-qaterlerge tiimdi jaýap retinde qalyptasty. Qytai usynǵan halyqaralyq yntymaqtastyqtyń jańa platformasy Aziia, Eýropa jáne Afrikanyń kóptegen elderiniń damýynda asa mańyzdy saiasi, ekonomikalyq jáne mádeni ról atqarýda, – dedi Qazaqstannyń Tuńǵysh Prezidenti.
Elbasy «Bir beldeý, bir jol» ekinshi halyqaralyq yntymaqtastyq forýmy ózara tiimdi qarym-qatynasty damytý máselelerine arnalǵan mańyzdy basqosýǵa ainalǵanyn aitty.
Qazaqstannyń Tuńǵysh Prezidenti, sondai-aq, eki eldiń ekonomikalyq jobalardy iske asyrýǵa baǵyttalǵan birlesken jumysynyń nátijelerine toqtaldy.
– Osy múmkindikti paidalan otyryp, Sizdi, Tóraǵa Si Tszinpin, Qytai Úkimetin jáne halqyn «Bir beldeý, bir jol» forýmyn tabysty ótkizýlerińizben quttyqtaimyn. Qytailyq ereksheligi bar «jańa dáýir» sotsializmin qurý jáne «qytai armanyn» júzege asyrý jónindegi barlyq maqsattar men mindetter Sizdiń jáne Qytai Kommýnistik partiiasynyń basshylyǵymen oryndalady dep senemin, – dedi Nursultan Nazarbaev.
Qazaqstannyń Tuńǵysh Prezidenti Qytai memleketiniń basshylyǵy men halqyna kórsetken qonaqjailyǵy men marapaty úshin rizashylyq bildirdi.
– Qazaqstan men Qytaidyń jan-jaqty strategiialyq seriktestigi halyqtarymyzdyń igiligi jolynda odan ári nyǵaia beredi dep úmittenemin. Sizge asa jaýapty memlekettik qyzmetińizde – jańa jetistikter, al dostas Qytai halqyna baq-bereke tileimin, – dedi Nursultan Nazarbaev.
Qytai Halyq Respýblikasynyń Tóraǵasy Si Tszinpin Qazaqstannyń Tuńǵysh Prezidentiniń eki jaqty qatynastardy nyǵaitýǵa qosqan úlesine toqtalyp, Elbasynyń halyqaralyq yntymaqtastyqty damytý isine sińirgen eńbegin erekshe atap ótti.
– Búgin biz Qytai halqynyń naǵyz dosy – Qazaqstannyń Tuńǵysh Prezidenti Nursultan Nazarbaevqa Qytai Halyq Respýblikasynyń joǵary syrtqy marapaty – «Dostyq» ordenin resmi tabys etý rásimin ótkizip otyrmyz. Prezident Nursultan Nazarbaevtyń búkil álemde zor bedeli bar. Ol Qazaqstan men Qytai arasyndaǵy jan-jaqty strategiialyq seriktestiktiń negizin qalap, osy qatynastardy árdaiym damytyp keledi. Qazaqstan Shanhai yntymaqtastyq uiymyn quryp, Aziiadaǵy ózara yqpaldastyq jáne senim sharalary jónindegi keńeske bastamashy boldy. Qazaqstannyń Tuńǵysh Prezidenti óziniń saiasi kóregendiginiń arqasynda osy uiymdardy damytyp, óńirlik jáne jahandyq deńgeide beibitshilik pen turaqtylyqty qoldaýǵa zor úles qosyp keledi, – dedi Si Tszinpin.
