Qazaqstan Respýblikasynyń Tuńǵysh Prezidenti – Elbasy koronavirýs indetinen qaza bolǵandardyń týystary men jaqyndaryna kóńil aitty.
Bul týraly búgin Elbasynyń resmi saity habarlady.
«Qurmetti qazaqstandyqtar!
Búginde Qazaqstan buryn-sońdy bolmaǵan kúrdeli ahýalmen betpe-bet kelip otyr. Qaýipti indet bizdiń qalalarymyz ben aýyldarymyzǵa tarap, ókinishke qarai, adam shyǵyny oryn alyp jatyr.
Memleket basshysynyń sheshimimen 13 shilde koronavirýs indetinen qaitys bolǵan azamattardy eske alý – Ulttyq aza tutý kúni bolyp jariialandy.
Alapat dert bizdiń adamdarymyzdyń ómirin qiyp áketýde. Bul bárimizdiń qabyrǵamyzdy qaiystyryp otyr. Árbir kisi óliminiń artynda qara jamylǵan biraz adamnyń – ákeler men analardyń, qyzdarymyz ben uldarymyzdyń, dos-jarandarymyzdyń qaiǵy-qasireti tur.
Mezgilsiz qaza bolǵandardyń týǵan-týystary men jaqyndaryna qaiǵylaryna ortaqtasyp, kóńil aitamyn.
Biz bereke-birlik pen tutastyqtyń arqasynda talai synaqtan súrinbei óttik. Bul qiyndyqty da el bolyp eńseremiz dep senemin»,-delingen kóńil aitý habarlamasynda.
