Memleket basshysy Koreia Respýblikasyna memlekettik saparynyń qorytyndysy boiynsha otandyq BAQ ókilderi úshin baspasóz brifingin ótkizdi. Bul týraly Aqordanyń baspasóz qyzmeti habarlady.
Qazaqstan Prezidenti Ońtústik Koreia kóshbasshysymen kelissózdiń jemisti ótkenin jáne isker toptar ókilderimen kezdeskenin aitty.
«Olar Qazaqstanǵa zor qyzyǵýshylyq tanytyp, bizdiń delegatsiiamyzǵa airyqsha yqylas bildirdi. Sondai-aq tiisti qujattarǵa, Koreia úshin Qazaqstannyń Ortalyq Aziiadaǵy strategiialyq mánin aiqyndaityn birlesken málimdemege qol qoiyldy», – dedi Nursultan Nazarbaev.
Qazaqstan Prezidenti ekijaqty yntymaqtastyqtyń saýda-ekonomikalyq mańyzyn atap ótip, korei biznesiniń Qazaqstan ekonomikasyna 10 mlrd dollarǵa jýyq qarajat salǵanyna jáne jańa investitsiialar tartý jónindegi jumystardyń jalǵasyp kele jatqanyna nazar aýdardy.
«Biz korei kompaniialarynyń, sonyń ishinde LG kompaniiasynyń gaz-himiia kesheniniń iri jobasyna atsalysýy jóninde áńgimelestik», – dedi Memleket basshysy.
Nursultan Nazarbaev Qazaqstan ónerkásibiniń óńdeý sektorynyń damyp, ekonomikanyń ártaraptandyrylyp jatqan kezeńinde Ońtústik Koreiamen ózara is-qimyldy jandandyrýdyń erekshe máni bar ekenin aitty.
«Bul sapar indýstriialyq-tehnologiialyq damý tiimdiligin kórsetetin mańyzdy elmen yntymaqtastyǵymyzdy taǵy bir ret pysyqtaý úshin qajet boldy», – dedi Qazaqstan Prezidenti.
Sońynda Memleket basshysy ózge eldermen ózara bailanystardy jetildirýdiń maqsaty eń aldymen otandyq ekonomika úshin jańa múmkindikterdi izdestirý ekenine nazar aýdardy.
«Meniń shet elderge 2016 jyldyń sońyndaǵy ekonomikalyq saparlarym jaqsy nátijelermen aiaqtalýda – jańadan dostar taýyp, áriptestermen birge baǵytymyzdy aiqyndadyq. Bul Qazaqstan ekonomikasynyń damýyna da, búkil halyqtyń ál-aýqatynyń odan ári jaqsarýyna da paidaly», – dedi Nursultan Nazarbaev.
.jpeg)