Memleket basshysy Jambyl oblysyndaǵy jumys sapary aiasynda oblystyq Qazaqstan halqy Assambleiasy ornalasqan «Dostyq úiiniń» jańa ǵimaratyn aralap kórdi, - dep habarlaidy "Ult aqparat" Aqordaǵa silteme jasap.
Nursultan Nazarbaev Jambyl oblysynyń etnomádeni birlestikteriniń ókilderimen áńgimelesti.
– Men sizderge Ózbekstan men Túrikmenstanǵa saparlarymnan soń kelip otyrmyn. Bizdiń kezdesýlerimiz ben ýaǵdalastyqtarymyzdyń nátijesinde osyǵan deiin bolǵan kedergilerdiń barlyǵy alynyp tastaldy. Búginde jaqyn kórshilerimizben tiimdi yntymaqtasý úshin barlyq jaǵdai jasalǵan, – dedi Qazaqstan Prezidenti.
Elbasy «Bolashaqqa baǵdar: rýhani jańǵyrý» atty maqalasynyń ózekti tustaryna erekshe toqtaldy.
– Sanamyzdy jańǵyrtý – qoǵam úshin qai kezdegiden ótkir másele bolyp tur. Aqparattyq-tsifrlyq zamanda bir orynda turýǵa bolmaidy, búgingi talaptar men jaǵdaiǵa sáikes jetilip, ózgerip otyrý qajet. Adamdarmen birge búkil qoǵam da básekege qabiletti bolýǵa tiis, – dep túiindedi Memleket basshysy.
Sondai-aq, Nursultan Nazarbaev Qazaqstan halqy Assambleiasynyń biregeiligine jáne memlekettik tilimizdiń latyn álipbiine kóshýiniń mańyzdylyǵyna nazar aýdardy.
– Men turaqtylyq pen halqymyzdyń birligi damýymyzdyń kepili bolyp sanalatynyn árdaiym aityp júremin. Latyn álipbiine ótý máselesin durys túsingen jón. Til halqymyzdy odan ári biriktirý úshin jeteleýge tiis, – dep qorytyndylady Qazaqstan Prezidenti.
Sońynda Elbasy «Kóne Taraz» tarihi-arheologiialyq saiabaǵynyń aýmaǵynda júrgizilip jatqan arheologiialyq qazba jumystary barysynda tabylǵan eksponattardy kórdi.
***
Búginde «Dostyq úiinde» 175 qoǵamdyq kelisim keńesi, 27 analar keńesi, 12 aqsaqaldar keńesi, 12 mediatsiia kabineti, Qazaqstan halqy Assambleiasy kafedrasy, ǵylymi-saraptamalyq top, qol óner sheberleriniń klýby jáne «Aq jelken» jastar birlestigi jumys isteidi.
.jpeg)