QR Tuńǵysh Prezidenti – Elbasy kitaphanasynyń ujymy týristik saladaǵy «Astana Konvenshn Biýro» ókilderimen kezdesti, dep habarlaidy "Ult aqparat".
Kezdesýge ishki týrizmmen ainalysatyn kompaniialardyń ekskýrsiialyq jetekshileri, gid-aýdarmashylar, qala mektepteri men kolledjderiniń synyptan tys jumysty uiymdastyrýshylary qatysty. Basqosý kezinde Elbasy kitaphanasynyń jańa ekskýrsiialyq baǵdarlamalary, tartymdy kvestter, «Ujymymyzben birge mýzeige» jobalary tanystyryldy.
«Qazaqstan Respýblikasy Tuńǵysh Prezidenti – Elbasy kitaphanasynyń alańynda ózderińizben osyndai erkin formatta kezdeskenime qýanyshtymyn. Dástúrge ainalǵan bul kezdesýge biyl biz Nur-Sultan qalasynyń mektepteri men kolledjder direktorlarynyń tárbie jónindegi orynbasarlaryn da shaqyryp otyrmyz. Sebebi, bizdiń eń kóp kelýshilerimiz – jastar aýditoriiasy, sonyń ishinde oqýshylar men stýdentter. Sondai-aq, shetelden keletin týristter legi de jyl saiyn artyp keledi», - dedi QR Tuńǵysh Prezidenti – Elbasynyń kitaphanasynyń direktory Ámirhan Rahymjanov.
Kitaphana direktorynyń aitýynsha, jalpy Elbasy kitaphanasy elimizdiń Tuńǵysh Prezidenti N.Á. Nazarbaevtyń ideialary men bastamalaryn Qazaqstan aýmaǵynda ǵana emes, shet elderde ilgeriletetin, nasihattaityn iri aqparattyq-ideologiialyq keshen. Osyndai kúrdeli mazmundy ári erekshe tártiptegi nysan ekenine qaramastan, kitaphana jáne onyń mýzeiine kelem deýshilerge esik ashyq.
«Kitaphana uiymdastyryp júzege asyratyn barlyq is-sharalar da qatysam deýshilerge qoljetimdi. Ekskýrsiialyq qyzmetten basqa kitaphanada ǵylymi-tájirbielik konferentsiialar, seminar-treningter, lektsiialar, saiystar, kinokórsetilimder ótkiziledi. Al ekskýrsiialyq qyzmet kórsetý jumysy odan ári jandanyp, jańa ekskýrsiialyq baǵdarlamalaryn iske qosýda. Sebebi elimizde ishki jáne syrtqy týrizmdi damytýǵa tyń serpin berip otyrǵan memlekettik baǵdarlamalar bastaý alyp keledi. Soǵan orai, suranysqa usynys degendei, árqashan ózimizdiń turaqty da tańdaýly ekspozitsiialarymyz, merzimi boiynsha ýaqytsha delingenmen, mazmuny jaǵynan asa mańyzdy jáne tartymdy kórmelerimiz árdaiym qala turǵyndary men qonaqtaryn qýantyp keledi», - dedi Ámirhan Rahymjanov.
Elbasy kitaphanasy osylaisha jiynǵa kelgen pedagogtarǵa mańyzdy málimettermen bólisti. Qazaqstannyń óńir-óńirindegi kez kelgen týrist, qala turǵyndary men meimandary Elbasy kitaphanasynan Tuńǵysh Prezident Nursultan Nazarbaev qol qoiǵan tarihi qujattarmen, qundy jazbalarymen, qoldanǵan zattarymen tanysa alady.
.jpeg)