QR Tuńǵysh Prezidenti – Elbasy kitaphanasy men QR Bilim jáne ǵylym ministrligi yntymaqtastyq memorandýmyn bekitti, dep habarlaidy QazAqparat.
Bul qujat kitaphana men ministrliktiń birlesken mádeni-aǵartý jáne ǵylymi-zertteý jobalaryn júzege asyrýǵa, zertteý baǵdarlamalaryn, ǵylymi-praktikalyq is-sharalar, konferentsiia, forým, seminarlar uiymdastyrýǵa múmkindik beredi.
Kelisimge Elbasy kitaphanasynyń direktory Ámirhan Rahymjanov pen Bilim jáne ǵylym ministri Ashat Aimaǵambetov qol qoidy.
«Negizgi yntymaqtastyqqa baǵyttalǵan memorandým QR Tuńǵysh Prezidenti – Elbasy Nursultan Nazarbaevtyń ishki jáne syrtqy saiasattaǵy bastamalary men jahandyq ideialaryn keleshekte aqparattyq-imidjdik ilgeriletýge jáne qazaqstannyń jan-jaqty órkendeýi men dúniejúzilik qaýipsizdik júiesi ideialaryn odan ári halyqaralyq deńgeige damytýǵa baǵyttalǵan», - dedi Ámirhan Raqymjanov memorandýmǵa qol qoiý rásiminde.
Óz kezeginde Bilim ministri Elbasy qoryn jańa ǵimaratynyń ashylýymen quttyqtady jáne bul orynnyń bilim jáne ǵylym salasy úshin óte mańyzdy ekenin aitty.
«Elbasy usynǵan «Rýhani jańǵyrý» baǵdarlamasy bilim jáne ǵylym salasynda da keńinen júzege asyrylyp jatyr. Baǵdarlama aiasynda balalardy naqty osy mýzeige ákelip, sabaq ótkizýdiń mańyzy zor dep oilaimyn. Aldaǵy ýaqytta da ortaq jumysty uiymdastyramyz. Balalardan buryn, ózimizge de qyzyqty boldy. Munda jádigerler, qazirgi zamanǵa sai ártúrli kitaptar, jalpy elimizdiń tarihy bar», - dedi A. Aimaǵambetov.
Sonymen birge, ministr munyń aldynda da biraz jumys jasalǵanyn, tek JOO salasynda emes, balabaqsha, mektep pen kolledj, ǵylym salasynda úlken jumys júrgizilgenin atap ótti.
«Bul jumysty ári qarai da birge jalǵastyramyz dep oilaimyn. Áli de jańa bastamalar bolady. Simpoziýmdar, dóńgelek ústelder, konferentsiialar ótkizemiz. Esse baiqaýyn ótkizýge de bolady. Memorandým aiasynda naqty jumys josparyn bekitip alsaq, balabaqshadan bastap orta bilim, joǵary bilim men ǵylym salasynda sol kestege sáikes jumys atqarylsa dep josparlap otyrmyz», - dedi Ashat Aimaǵambetov.
