Búgin elordadaǵy Táýelsizdik saraiynda Qazaqstan Prezidenti Nursultan Nazarbaevtyń tóraǵalyǵymen Dúniejúzi qazaqtarynyń V quryltaiy óz jumysyn bastady, dep habarlaidy Ult.kz tilshisi QazAqparat agenttigine silteme jasap.
Quryltai jumysyna barlyǵy 750 delegat pen qonaq qatysýda. Onyń 350-i álemniń 39 elinen kelip otyr. Olar - ǵylymi-shyǵarmashylyq jáne pedagogikalyq ziialylar ókilderi, biznes, sport, buqaralyq aqparat quraldary salalarynyń mamandary, memlekettik jáne qoǵamdyq uiymdardyń qyzmetkerleri. Quryltai delegattary men qonaqtarynyń 80 paiyzy mundai is-sharaǵa alǵash ret qatysyp otyr.
Quryltai aiasynda Ulttyq akademiialyq kitaphanada belgili dintanýshy-ǵalymnyń 100 jyldyǵyna arnalǵan «Halifa Altai jáne tarihtyń oralýy» atty halyqaralyq ǵylymi-tájiribelik konferentsiia ótedi. Din isteri jáne azamattyq qoǵam, Bilim jáne ǵylym, Aqparat jáne kommýnikatsiialar, Mádeniet jáne sport, Densaýlyq saqtaý ministrlikteri Quryltaidyń sheteldik qonaqtarymen «dóńgelek ústel» otyrysyn uiymdastyrýdy josparlaýda.
Munan bólek, Quryltai delegattary men qonaqtary «EKSPO-2017» halyqaralyq kórmesimen tanysyp, etnoaýyldy aralaidy jáne «Astana Opera» teatrynda ulttyq mýzykamyzdyń altyn qoryna engen Evgenii Brýsilovskiidiń «Qyz Jibek» operasyn tamashalaityn bolady.
Dúniejúzi qazaqtary quryltaiynyń baspasóz ortalyǵynda 150 otandyq jáne sheteldik BAQ ókilderi aqparat taratýda.
Aita keteiik, 1992 jyldan beri ótkizilip kele jatqan Quryltai dúniejúziniń túkpir-túkpirinde turatyn etnikalyq qazaqtardyń kezdesý orny ári biregei suhbat alańy bolyp tabylady.
.jpeg)