- Prezident Nursultan Nazarbaev Ońtústik Koreia Respýblikasyna jasaǵan sapary aiasynda baspasóz brifingin ótkizdi.
Baspasóz máslixatynda jýrnalister Memleket basshysynyń tynymsyz jumys kestesine, onyń bir emes, birneshe elge sapar jasai otyryp, kóptegen kelissózderdi qalaisha úzdiksiz ótkizetinine qatysty suraq qoidy.
N.Nazarbaev osy saýalǵa jaýap bere otyryp, osydan bir ai buryn aýyryp qalǵanda qazaqstandyqtardyń oǵan qoldaý bildirgeni úshin óz alǵysyn jetkizdi , dep xabarlaidy QazAqparat tilshisi.
«Endi, ol - meniń jumysym. Sondyqtan sharshaýǵa bolmaidy. Bul - el aldyndaǵy jumysym, xalyq aldyndaǵy jaýapkershiligim. Al qiyndyǵyna keler bolsaq, bundai saparlar kezinde ýaqyttyń aiyrmashylyǵy qatty sharshatyp jiberedi. Meniń bir baiqaǵanym, bizge Shyǵysqa qarai júrgen yńǵaily eken. Al Batysqa barsań, qatty sharshap qalasyń, uiqyń qanbaidy. Ol kúnderi men ary ketse, úsh-tórt saǵat uiyqtaimyn. Basqasha bolmaidy. Erte jatsań da, kóziń ilinbeidi. Bir jaǵynan jaqsy shyǵar, óz ýaqytyńmen júresiń. Árine, ondaida miyń úzdiksiz istep turýy qajet. Oǵan qosa, resmi kezdesýler kezinde sózińdi ótkize bilý kereksiń, senimdi sóileýge mindettisiń. Qazaqstan ondai mártebege laiyqty. Sebebi jappai iadrolyq qarýsyzdandyrýǵa qosqan úlesi zor. Qazirgi beibit saiasaty da álem elderiniń qurmetine laiyq dep bilemin», - dedi N.Nazarbaev.
Osy oraida Memleket basshysy osydan bir ai buryn tumaýratyp qalǵan kezdegi qazaqstandyqtardyń qoldaýyn eske alyp, barsha xalyqqa óz rizashylyǵyn jetkizdi. "Aitpaqshy, meni tumaýratyp qaldy dep aqparat taratqanda ǵalamtor arqyly myńdaǵan qazaqstandyqtar jyly sózderin jazyp, meniń tezdetip saýyǵyp shyǵýymdy tilegen edi. Osy múmkindikti paidalanyp, barsha xalqyma alǵysymdy aitamyn. Ol týraly ashyq aitýǵa týra keldi. Sebebi jospar boiynsha Ázerbaijan men Armeniiaǵa sapar jasaýym kerek edi. Ony keiinge qaldyrýǵa májbúr boldym. Endi, jótel men temperatýra bolǵanda eshqaida shyǵa almaisyń ǵoi. Sondyqtan barshalaryńyzǵa raqmet aitamyn. Prezident bolǵannan keiin adam bar kúsh-jigerin xalyq úshin, el úshin jumsaý kerek dep bilemin», - dep atap kórsetti Memleket basshysy.
.jpeg)