Memleket basshysy Nursultan Nazarbaev Almatyǵa jumys sapary barysynda qaita jańǵyrtylǵan Jibek Joly, Panfilov, «Astana» alańdaryn tamashalady, dep habarlaidy QazAqparat.
Qala ákimi Memleket basshysyna aqyly turaq baǵdarlamasyn engizgeli beri biýdjet túsimi 5 ese artqanyn baiandady. Onyń aitýynsha, aqyly turaq júiesinen biýdjetke 190 mln teńge túsken.
Al, «Ońai» tólem júiesiniń saralanǵan tarifi engizilgeli beri kóleńkeli ainalymnan sońǵy aida 700 mln teńge jaryqqa shyqqan.
Aita ketý kerek, biyl Almatydaǵy tarihi ortalyqtyń 1/3 bóligi qaita jasaldy. Naqtyraq aitsaq, Jibek joly kóshesiniń Abylai han men Qonaev arasyndaǵy bóligi tolyǵymen qaita jasaldy.
Bul aimaqta tabiǵi granit kespetastary tóselip, jańa qurǵaq sýburqaqtar, avtorlyq pishinder, oryndyqtar men balalar alańdary, ǵimarat qasbetteri jasaldy.
Panfilov kóshesiniń Jibek Joly men Qabanbai arasyndaǵy bóligi jaiaý júrginshilerge arnalyp qaita jasaldy.
Munda da qurǵaq sýburqaqtar, avtorlyq kishi pishinder, zamanaýi, túngi jaryqtandyrý júiesi, oryndyqtar, kishi arhitektýralyq pishinder, balalar jáne sport alańdary jasaldy.
Sonymen qatar, Astana alańyn qaita jasaý kezinde tabylǵan 1 ǵasyrǵa jýyq tarihy bar kespetastar Panfilov dálizine tóseldi.
Astana alańynda kólik joly qysqartylyp, onyń ornyna trotýar, velojol salyndy. Granit kespetastary tóseldi. Lavanda klýmbalary otyrǵyzyldy. Eki qurǵaq sýburqaq ornatylyp, túngi jaryqtandyrý júiesi jasaldy.
Sonymen qatar, búgin Memleket basshysy Nursultan Nazarbaev Naýryzbai aýdanyndaǵy 500 adamǵa arnalǵan emhana men «Týǵan jer» baǵdarlamasy aiasynda salynǵan «Zavod Elektrokabel» JShS ǵimaratynda boldy.
Emhana ǵimaraty qalanyń kommýnaldy menshigine berilgen. Munda elektrondy tirkeý, Call-ortalyq, jedel járdem brigadalary ornalasqan.
Jaqyn arada Qalqaman shaǵyn aýdanynda 200 adamǵa arnalǵan meditsinalyq mekeme paidalanýǵa beriledi. Al Taý samaly shaǵyn aýdanynda 500 adamǵa arnalǵan emhananyń qurylysy bastaldy.
