QR Premer-Ministri Asqar Mamin «100 naqty qadam» ult josparyn sapaly oryndaý maqsatynda Elbasynyń «El úmiti» bastamasy aiasynda iske asyrylǵan ózgeristerdi basqarý jónindegi salalyq menedjerlerdi daiarlaý baǵdarlamasyna qatysýshylardyń forýmyn ótkizdi, dep habarlaidy primeminister.kz.
Is-sharaǵa Prezidenttiń kómekshisi – QR Qaýipsizdik Keńesiniń hatshysy Áset Isekeshev, ortalyq memlekettik organdardyń basshylary, mentorlar jáne ekonomika men áleýmettik salanyń 11 salasy: ónerkásip, AÓK, qurylys, geologiia, densaýlyq saqtaý, bilim berý, media, saýda jáne logistika, sý resýrstary, týrizm, mádeniet jáne sport komandalarynyń qatysýshylary qatysty.
Ózgeristerdi basqarý jónindegi salalyq menedjerlerdi daiarlaý baǵdarlamasy Nursultan Nazarbaev qorynyń bastamasymen, QR Úkimetiniń jobalyq ofisimen birlesip júzege asyryldy.
Baǵdarlamanyń maqsaty — ekonomikanyń negizgi salalaryn transformatsiialaý úshin naqty usynystar ázirleý.
2020 jyldyń basynda ótkizilgen konkýrs qorytyndysy boiynsha 2958 úmitkerden, ásirese, jetekshi ulttyq jáne sheteldik uiymdarda úlken praktikalyq jumys tájiribesi bar 234 sarapshy iriktep alyndy.
Baǵdarlamaǵa mentor retinde Qazaqstannyń, AQSh-tyń jáne Eýropa elderiniń memlekettik jáne jeke sektorlarynan 64 maman qatysty.
2020 jyldyń ishinde QR Premer-Ministri A. Mamin baǵdarlamaǵa qatysýshylarmen 50-ge jýyq betpe-bet kezdesý ótkizdi.
Ózgeristerdi basqarý jónindegi menedjerler salalyq mindetterdi sheshe otyryp, elimizdiń damýyna úles qosyp qana qoimai, Elbasy akademiiasy uiymdastyrǵan trening sharalary barysynda óz biliktiligin jaqsartty.
Úkimet basshysy Ózgeristerdi basqarý jónindegi salalyq menedjerlerdi daiarlaý baǵdarlamasy QR Tuńǵysh Prezidenti – Elbasy Nursultan Nazarbaev pen Memleket basshysy Qasym-Jomart Toqaev tarapynan jastardyń jobalary men bastamalaryn qoldaýdyń, sondai-aq Úkimettiń jas mamandarmen tiimdi ózara is-qimylynyń jarqyn mysaly bolyp otyrǵanyn atap ótti.
Salalyq menedjerlerdiń, mentorlardyń jáne memlekettik organdar ókilderiniń úilesimdi jumysynyń arqasynda eldi damytýǵa baǵyttalǵan 150-den astam naqty bastama ázirlengen.
«Salalyq menedjerlerdiń árbir usynysyn tiisti memlekettik organdar egjei-tegjeili qarady. Ár sala boiynsha jol kartalary ázirlendi. Endi bizdiń basty mindetimiz – olardyń is júzinde júzege asyrylýyn qamtamasyz etý. Mindetterdiń basym bóligi osy jyldyń sońyna deiin oryndalýy tiis», — dedi A. Mamin.
Premer-Ministr salalyq menedjerlerdiń bastamalaryn iske asyrý Qazaqstan Respýblikasynyń 2025 jylǵa deiingi ulttyq damý jospary sheńberinde ekonomikanyń turaqty ósimin qamtamasyz etý jáne halyqtyń ál-aýqatyn arttyrý boiynsha mindetterdi sheshýge yqpal etetinin atap ótti.
.jpeg)