2026 jyldyń birinshi jartyjyldyǵynyń qorytyndysy boiynsha Qazaqstannyń naqty JIÓ ósimi 4,1%-dy qurady. Úkimet otyrysynda Premer-ministrdiń orynbasary – ulttyq ekonomika ministri Serik Jumanǵarin elimizdiń jańa makroekonomikalyq kórsetkishterin usyndy, dep habarlaidy ult.kz.
Qańtar-mamyr ailarymen salystyrǵanda qarqyn 0,4 paiyzdyq tarmaqqa jaqsardy. Negizgi serpindi 4%-dan 5,1%-ǵa deiin kóterilgen naqty sektor qamtamasyz etti. Qyzmet kórsetý salasy 3,5%-ǵa ósti. Eń joǵary ósim qurylys, óńdeý óndirisi, kólik jáne saýda salalarynda tirkeldi. Sondai-aq agroónerkásip kesheni men bailanys salasynda da oń serpinsaqtaldy.
«Jyl basynan beri ekonomika jedeldep keledi. Oń dinamika naqty sektordaǵy ósý qarqynyn arttyrý esebinen qamtamasyz etilýde. Ekonomika ósýiniń negizgi qozǵaýshy kúshi munaiǵa qatysty emes sektor bolyp qala beredi. Biyl munai emes sektordyń ósý qarqyny turaqty túrde 5%-dan asýda», — dedi Serik Jumanǵarin.
Negizgi kapitalǵa salynǵan investitsiialar 9,5 trln teńgeni qurap, 9,6%-ǵa ósti. Onyń ishinde jeke investitsiialar kólemi 21,4%-ǵa artyp, jalpy qurylymda 87%-dy qurady. Eń joǵary ósim aqparat jáne bailanysta – 2,3 ese, qurylysta – 38,7%, óńdeý ónerkásibinde – 33,3%, aýyl sharýashylyǵynda – 24,6% jáne kólik salasynda – 11,6% tirkeldi.
Syrtqy saýdada qańtar-mamyr ailarynda taýar ainalymy $56,3 mlrd-ty qurady. Eksport $30,4 mlrd-qa jetti, import $26 mlrd saýda balansynyń profitsiti $4,4 mlrd-tan asty.
