Taraz qalasynda Qazaqstan halqy Assambleiasynyń uiymdastyrýymen Qazaqstan Respýblikasy Táýelsizdiginiń 25 jyldyǵyna arnalǵan «Meniń elim – Máńgilik El» respýblikalyq jastar aktsiiasy ótti. Merekelik sharaǵa Qazaqstan halqy Assambleiasy jastar kóshbasshysy Maksim Spotkai, Jambyl oblysy ákiminiń orynbasary Erqanat Manjýov, oblystyq Assambleia músheleri, qoǵam qairatkerleri, etnomádeni birlestikter men jalyndy jastar qatysty.
«Máńgilik El» jalpyulttyq patriottyq ideiasy men onyń qundylyqtaryn qazaqstandyq qoǵamda, ásirese jastar arasynda ilgeriletý, táýelsiz Qazaqstannyń qalyptasýyna elimizdiń barlyq aimaqtaryndaǵy jastardyń qosqan úlesin jáne jetistikterin kórsetýdi maqsat tutqan bul is-sharada jambyldyq ulandar eldiń birligin, yntymaǵyn pash etti.
Jasyndai jarqyraǵan táýelsiz eldiń jastary respýblikalyq aktsiianyń estafetasyn Ońtústik Qazaqstan oblysynan qabyldap aldy. Sondai-aq, ońtústikqazaqstandyq órender «Máńgilik El» jastarynyń jetistikteri – Qazaqstan Respýblikasy Táýelsizdiginiń 25 jyldyǵyna» kitabyn da kieli Jambyl jerine jetkizdi. Bul kitapqa Táýelsizdik jyldary jastardyń qol jetkizgen jetistikteri, óńirlerde jastarǵa jasalǵan qamqorlyqtar, «Máńgilik El» patriottyq ideiasynyń biriktirýshi rólin jáne óńirlerdegi jastardyń Elbasyna qoldaý kórsetken úndeýleri jazylýda. Iaǵni, jylnama Jambyl jastarynyń jetistikterinen de syr shertetin bolady. Óitkeni, memleketimizdiń ósip-órkendeýinde, alǵa qarai qadam basýynda áýlieatalyq jastardyń da qosqan úlesi airyqsha. Jambyl jastary álemdik deńgeide ushqyr bilimi men bilek kúshimen, san qyrly ónerimen eline degen súiispenshiligin, týǵan jerine, týǵan eline degen qurmetin tanyta bildi. Talai dodada oza shaýyp, Qazaq eliniń abyroiyn asqaqtatyp, elimizdiń týyn joǵary kóterip júrgen ár túrli ulttyń jastary aktsiia barysynda sahna tórine shyǵyp, júrekjardy lebizderimen bólisti.
Bul kúni jambyldyq jastar «Biz, Qazaqstannyń azamattary, Nursultan Ábishuly Nazarbaevtyń tarihi «Táýelsizdik tolǵaýyn» negizge ala otyryp, eldiń myzǵymas Jeti tuǵyryn nyǵaitýǵa, saqtaýǵa jáne urpaqtan urpaqqa amanat etýge shaqyramyz», dei kelip, Elbasyna úndeý joldady.
Aktsiia sońynda «Máńgilik El» kitabyn Qyzylorda oblysy jastarynyń qolyna búkil qazaqstandyqtardyń maqtanyshy, Rio Olimpiadasynyń kúmis júldegeri Eldos Smetov saltanatty túrde tabys etti. Bul kúni án men jyrdan shashý shashyldy. Bir shańyraq astynda mekendegen, yntymaǵy men birligi jarasqan elimizdiń bul merekesine myńnan astam jastar qatysyp, qoldaý kórsetti. Laiym, «Máńgilik Eldiń» qyran qustai qanatty urpaqtary jasai bersin!
Oralhan DÁÝIT,
«Egemen Qazaqstan»
.jpeg)