Búgingi Senattyń jalpy otyrysynyń aldynda QR Tuńǵysh Prezidenti – Elbasy Nursultan Nazarbaev palatanyń múshelerine «Qurmetti Senator» mártebesin berý sheshimin qoldaǵany úshin alǵysyn bildirdi, dep habarlaidy Baq.kz agenttigi.
«Qadirli depýtattar, senatorlar, búgin Senatqa arnaiy kelip, ózderińizben júzdeskenime óte qýanyshtymyn. Osy alasapyran 30 jyldyń ishinde kópshiligińizben bir kele jatyrmyz. Qýanyshty da, qiynshylyqty da birge ótkizip, elmen, jurtpen birge qyzmet istep, eńbegińizdi sińirip kele jatyrsyzdar. Men ádeii osyndai eki palataly Parlament quryp, zańdy súzbeden ótkizip, óńirlerdiń oiyn eskerý úshin jasadym. Búgingi istelip otyrǵan shara – maǵan «Qurmetti Senator» mártebesin berý sheshimin qabyldaǵandaryńyz úshin shyn júregimnen rizashylyǵymdy bildiremin. Bul – bizdiń egemen elimizdiń osy jyldardyń ishinde men jasaǵan eńbegimniń bir ushynyń mártebesi, soǵan degen qurmet dep bilemin», - dedi Elbasy.
Ol Qazaqstannyń búgingi dárejesi ońailyqpen kelmegenin atap ótti.
«Táýelsizdik jyldary kóp jaǵdai boldy. Kóp jumys istedik. Parlament kóp zań qabyldady. Shielenisken zańdar da boldy onyń ishinde, kelispegen zańdar da boldy. Degenmenen, Senat baisaldylyqpen qarap, onyń barlyǵyn ornyna keltirdi. Ony ózderińiz de bilesizder. Sondyqtan elimiz tynysh boldy. Eshqandai jaǵdailarǵa jol bergenimiz joq. Minekei, men el basyna kelgeli dál osy aidyń ishinde 30 jyl bolady eken. Sonyń ishinde tizimge qarap otyrsam, kópshiligińizben birge kele jatyrmyz. Birge jumys istep, birge júrip, birge kúlip-oinap degendei. Talai nárseni basymyzdan ótkizdik. Elimiz turaqtandy. Dúniejúzine belgili Qazaqstan boldy. Aiaǵynan tik turdy. Ekonomikasy kóterilip, halyqtyń ál-aýqaty birshama emes, óte kóp deńgeige kóterildi. Halyq ony kórip otyr. Qazaqstanǵa baǵyttalǵan birneshe baǵdarlama qabyldanyp, iske asyryp jatyr. Onyń barlyǵyna sizder atsalysasyzdar. Josparlanǵan reformalar tabysty iske asyrylý da sizderge, sheshimderińizge bailanysty... Dúniede bolyp jatqan jaǵdaidy bilip otyrsyzdar. Qudaiǵa shúkir, ystyq soǵys bolmasa da, ekonomika, tehnologiia jaǵynan birin-biri jibermeý úshin surapyl kúres júrip jatyr. Osynyń ishinde bizge alpaýyt elderdiń ortasynda otyryp, táýelsizdigimizdi saqtap qalý, ózimizdiń saiasatymyzdy júrgizip, solarmen dos bolyp, jumys isteý ońaiǵa túse qoiǵan joq. Báriń bilesizder. Ony qazir aitýǵa ońai. Dál osylai bola qoiǵan siiaqty dep oilaidy keibireýler. Biraq sandaǵan kelissózder, sandaǵan kezdesýler. Biz alpaýyt elderdiń aldynda Qazaqstannyń dárejesin qalai kóteremiz? Tek parasatpen, aqylmen, durys sózben, durys qarym-qatynaspenen, kórshilik qarym-qatynaspen ǵana olardyń kóńilin aýlaimyz», - dedi Nursultan Nazarbaev.
Sonymen qatar, Elbasy Senattyń eldegi mańyzdy zańdardy qabyldaýdaǵy ornynyń erekshe ekenin aitty.
«Endi mine altynshy shaqyrylymdaǵy IV sessiia aiaqtalyp kele jatyr. Qazir maǵan kóp sóilei berýdiń jaǵdaiy joq. Bul sessiianyń ózinde kóp mańyzdy zań qabyldadyńyzdar. Tiisti jobalardy jan-jaqty qarap, sapaly zań shyǵarý – sizderge senip tapsyrylǵan missiia. Parlament Senatynyń ereksheligi – sizder ár óńirden sailandyńyzdar. Ár óńirdiń jaǵdaiyn osy jerge alyp keldińizder. Májilistiń jaǵdaiy ol basqa. Sondyqtan dárejesi óte kóp. Bizdiń basqarý júiesine qarai barlyǵy da ózderiniń senattaryń, parlamentin osylai túzep kele jatyr. Sondyqtan taǵy bir raqmet aita otyryp, endi osyndai «Qurmetti Senator» mártebesin alý úlken qurmet. Sizderdiń kópshilikterińizben jumys isteýimdi jalǵastyramyn. Meniń biyl qabyldaǵan sheshimim – bolashaq úshin jáne men júrgizgen sońǵy 30 jyldaǵy saiasattyń sabaqtastyǵy úshin», - dedi ol.
Budan bólek, Elbasy óziniń prezidenttik ókilettigin toqtatý týraly sheshimin kóptegen elderdiń basshylary qalai qabyldaǵanyn aityp berdi.
«Men óziminiń ókilettigimdi toqtatý týraly sheshim jasaǵanda, barlyq memleket basshylarynan hat aldym jáne olarmen telefon arqyly sóilestim. Osyndai reaktsiia bolatynyna ózim tańǵaldym. Budan bizdiń barlyǵyna taǵy da úlgi kórsetkenimizdi baiqaýǵa bolady. Iaǵni, bilik tranziti máselesin qalai sheshý kerektigin kórsettik. Osy oraida barlyq qadamdarda halyq danalyǵy bolýy tiis», - dedi N. Nazarbaev.
Eske sala keteiik, búgin Senat tóraǵasy Dariǵa Nazarbaeva QR Tuńǵysh Prezidenti – Elbasy Nursultan Nazarbaevqa «Qurmetti Senator» tósbelgisi men kýáligin tabystady.
