Astanada ótken EKSPO-2017 halyqaralyq mamandandyrylǵan kórmesiniń jabylý saltanatyna kelgen qonaqtar bolashaqqa saiahat jasaidy, dep habarlaidy QazAqparat shoý uiymdastyrýshylaryna silteme jasap.
10 qyrkúiek kúni ótetin mýltimediialyq shoýda «jasyl» tehnologiialar men kórmege qoiylǵan eń úzdik jańalyqtar kórsetiledi. Onda qonaqtar eń úzdik zamanaýi jetistikter úirenshikti bolyp ketken bolashaq ómirdi kóre alady.
«Qoiylymda EKSPO-2017 kórmesiniń adamzattyń bolashaǵyna qalai áser etetinin, Kórmege qoiylǵan jańa ónertabystardyń kómegimen álemniń qalai ózgeretinin kórsetemiz. Basty rólde adam oinaidy. Sebebi, adam - teńdessiz tehnologiialyq jetistikterdiń avtory», - deidi jabylý saltanatynyń bas prodiýseri Borislav Volodin.
Ol shoýdyń ádemi ǵana emes, paidaly derekterge toly bolatynyn da atap ótti. Kórermender aldyńǵy qatarly ǵylymi jańalyqtar men Kórme týraly qorytyndy statistikalyq málimetterge qanyq bolady.
Teatrlandyrylǵan shoýǵa 2 232 adam qatysady, olardyń arasynda volonterlar men kórmege qatysýshy elderdiń ókilderi bar.
Kúrdeli injenerlik, qoiylymdyq jáne kórkem sýretkerlik sheshimder qoldanylatyn Hi-Light Show kórermenderdi bolashaq álemge jeteleidi. Áýede qalqyp turǵan dekoratsiialar gimnasttarmen birge qozǵalady, sahna únemi ózgerip otyrady jáne munyń barlyǵyn tanymal kompozitor Aleksandr Kniazevtiń ǵajap mýzykasy súiemeldeidi.
Jabylý saltanatynyń tikelei transliatsiiasy «Astana EKSPO-2017» resmi saitynda jáne Ýoutube-arnasynda júrgiziledi.
