- Gollivýd akteri, BUU-nyń klimat problemalary jónindegi beibitshilik elshisi, «Oskar» syilyǵynyń laýreaty Leonardo di Kaprio Qazaqstan Úkimeti men Jolbarystardyń popýliatsiiasyn qaita qalpyna keltirý jónindegi jabaiy tabiǵat qory arasyndaǵy kelisimge qol qoiý rásimine qatysady.
Bul týraly búgin Ortalyq kommýnikatsiialar qyzmetindegi brifingte «Jasyl ekonomikany qoldaý jáne G-Global-dy damytý koalitsiiasy» zańdy tulǵalar birlestiginiń basqarma tóraiymy Saltanat Rahymbekova málim etti, dep habarlaidy "Ult aqparat" QazAqparat agenttigine silteme jasap.
Onyń atap ótýinshe, koalitsiia «Jasyl kópir» seriktestik baǵdarlamasy aiasynda úlken kelisimdi júzege asyrýǵa kiristi. Bul kelisim elimizde 30-40 jyl jumys istep, Ile-Balqash óńirindegi ekojúieni, jolbarystardyń popýliatsiiasyn qaita qalpyna keltirý baǵytyn jandandyrýy tiis.
«Biz Jabaiy tabiǵat qorymen birlesip, bizdiń Úkimet pen qor arasynda atalǵan jobaǵa 10 mln. eýro qarjy tartý týraly úlken kelisim daiyndap jatyrmyz. Bul kelisimge 2017 jyldyń 8-9 qyrkúieginde, iaǵni EKSPO kórmesiniń jabylýy kezinde qol qoiylady. Jabaiy tabiǵat qory atynan Niderlandy hanshaiymy Laýrentin keledi. Ol Niderlandynyń Klimattyń ózgerýi jónindegi qoryna basshylyq jasaidy. BUU-nyń klimattyń ózgerýi jónindegi elshisi, WWF-tiń jolbarys baǵdarlamasynyń elshisi Leonardo di Kaprio da kelmek. Munan bólek, tanymal ǵaryshkerler de bolady», - dedi ol.
Rahymbekovanyń atap ótýinshe, qazirgi ýaqytta ministrliktermen jáne «Astana EKSPO-2017» kompaniiasymen birge atalǵan shara ótetin aimaqty belgileý máseleleri talqylaný ústinde.
«Sondyqtan bizdiń osydan eki jyl burynǵy klimattyń ózgerýi jónindegi birinshi ári jalǵyz elshi Di Kapriony Qazaqstanǵa shaqyrý bastamamyz júzege asatyn siiaqty. Óitkeni, Jabaiy tabiǵat qory bul sapardyń barlyq qarjylyq shyǵyndaryn óz moinyna alady», - dedi ol.
