Álem nazaryn aýdarǵan «EKSPO-2017» halyqaralyq kórmesiniń eki millionynshy kelýshisi tirkeldi.
Ol - Oral qalasynyń turǵyny, jeke kásipker Ǵaisa Jumaliev. 34 jastaǵy jas kásipker kórmege arnaiy is-saparmen kelgen. Buǵan deiin bir márte kórme qonaǵy bolǵan eken.
Ǵaisa London biznes mektebin bitirgen, 5 jyl munai jáne gaz sektorynda jumys atqarǵan. Búginde munai sektoryna arnalǵan himreagentterdi óndiretin jeke kompaniiany basqarady.
Ol mundai tosyn oqiǵaǵa tap bolamyn dep oilamaǵan. Ǵaisa Jumaliev: "Men óte qýanyshtymyn. Kórmeniń kireberisinde maǵan eki millionynshy kelýshi ekenimdi aitqanda ne isterimdi bilmei qaldym. Biletti osy Astanadaǵy «Mega» saýda oiyn-saýyq kesheninen satyp alǵan edim. Chehiia pavilonyn aralap úlgerdim. Endá Shell pavilonyna bara jatqanmyn. Meni «EKSPO-2017» baspasóz ortalyǵyna jýrnalistermen kezdesýge shaqyrdy. Bul men úshin tosynsyi boldy", - deidi.
«Astana EXPO – 2017» UQ» AQ basqarma tóraǵasy Ahmetjan Esimov bul kúnniń Ulttyq kompaniia úshin aitýly kún ekenin atap ótti. "Kórmege eki million adamnyń kelgenine bárimiz kýá bolyp otyrmyz. Negizi jalpy kórme aiaqtalǵanǵa deiingi kelýshilerdiń mejesi 2 million dep boljanǵan edi. Ózderińizge belgili, kórmeniń aiaqtalýyna áli bir aidan astam ýaqyt bar. Sondyqtan kelýshiler sany mejeden áldeqaida asatynyna kózimiz jetti. Belgilengen mejege ýaqytynan buryn jetýimiz Elbasymyzdyń aýqymdy jobasynyń oidaǵydai iske asyp jatqandyǵyn bildiredi", - dedi.
