"EKSPO-2017" halyqaralyq mamandandyrylǵan kórme aiasynda Astanada aptasyna eki oblystan mədeni kúnderin ótkizýde. Sol arqyly óńir basshylarynyń mədeniet pen ónerdi, sportty qoldaý jaiy, ónerpazdardyń ózderiniń izdenis deńgeii bilinip qalyp jatyr.
Óz basym Almaty jáne Atyraý oblystarynyń kúnderine kóńilim toldy. Bul aimaqtardyń mədeni baǵdarlamasy aýqymdylyǵymen este qaldy. Al osy kúnderi ótip jatqan Shyǵys Qazaqstan oblysynyń kúnderi "əttegen-ai" degizip tur.
"Shyraily Shymkent", "Shuǵylaly Shyǵys" degen sóz tirkesteri qulaǵymyzǵa ábden sińisti boldy. Biraq osy joly "Nurshyǵys" degen tosyn tirkesti "Feisbýkten" kórip, talaiymyz ishegimiz túiilgenshe kúldik. Al bile bilgen adamǵa bul - sorlylyq...
Búgin saǵat 18.00-de "Etnoaýyl" ulttyq-mədeni kesheninde Shyǵys Qazaqstan oblysy ónerpazdarynyń kontserti ótedi. Kontsert baǵdarlamasy qolǵa túsip, ol da biraz kúńgirt oilarǵa jetelep otyr. Meniń uǵymymdaǵy mədeni kúnder sol óńirden shyqqan tuǵyrly tulǵalardyń qazaq ónerine qosqan úlesin pash etý, Astanadan jyraqta jatsa da, biik ónerge adaldyq tanytyp kele jatqan adamdarǵa bir kósilýge múmkindik berý. Men úshin shyǵystaǵy sondai adamdardyń biri - Baqyt Úderbaeva. Ənshi búgingi kontsertke qatysady, alaida keń kósile almaityn bolyp otyr.
Sosyn kontsert baǵdarlamasyna marqum Tursynǵazy Rahimovtiń bir-aq əni engizilipti. Jaryqtyq Bolat Sybanovtyń ənderi múlde joq. Osyny estip, baǵdarlamaǵa kóńili tolmaǵan ənshi Serik Ospanov ta "Biz Bolat Sybanovtyń ənderine terbelip ósken urpaqpyz" dep jatyr.
Osyǵan qarap, shyǵystyqtar repertýarmen múlde jumys istemeidi degen oiǵa qalyp otyrmyn. Estýimshe, Abai atyndaǵy teatr bir-aq spektaklmen kelipti. Onyń ózi sheteldik avtordiki. Búgingi kontserttik baǵdarlamaǵa Baýyrjan Esebaevtyń el kúnde estip júrgen "Súigenim bol", orystyń birneshe ənin qosypty. Aý, solardyń ornyna Tursynǵazy Rahimov pen Bolat Sybanovtyń ənderin qossa, taqiiaǵa tar kelmes edi ǵoi...
Shyny kerek, osydan keiin ózim týǵan Qaraǵandy oblysynyń mədeni kúnderi abyroimen ótse eken dep tilep otyrmyn. Teatr ulttyq spektakl əkelip (birneshe qoiylym bolsa, tipti jaqsy), ənshi, kúishilerdiń repertýaryna qaidaǵy joq shyǵarmalar enip ketpese eken. Jaǵdaiyn jasap turyp, Qorabai Esenovti Astanaǵa aldyrtsańyzdar meniń ǵana emes, tutas jurttyń alǵysyn alar edińizder. Oǵan sebep te bar, "Jas qalam" əni osydan jarty ǵasyr buryn osy Astanada, sol ýaqyttaǵy Tselinogradta týǵan (kelesi jyly aǵanyń mereitoiyna orai elordada shyǵarmashylyq keshi ótse, tipti ǵajap bolar edi). Qysqasy, mədeni baǵdarlamaǵa abai bolyńdarshy, óńirler!
Amanǵali Qaljanovtyń feisbýktegi jazbasynan
