Astanadaǵy EKSPO-2017 kórmesinde Singapýr «Úlken ideialardyń shaǵyn qalasy» («Small City, Big Ideas») atty ulttyq pavilony arqyly óz tájiribesin tanystyrady. Terrariým úlgisinde jasalǵan pavilonda turaqty energetika salasyndaǵy ártúrli ideialar men innovatsiialar kórsetiledi, dep habarlaidy QazAqparat tilshisi QR Syrtqy ister ministrliginiń baspasóz qyzmetine silteme jasap.
Pavilonǵa kirgen boida qonaqtar Singapýrdyń tropikalyq ormanynda júrgendei bolady. Odan keiin mýltimedialyq ekrandar arqyly Singapýrdyń energiia salasyndaǵy tarihymen tanysýǵa múmkindik bar. Atalǵan memleket shaǵyn kólemine qaramastan, kóptegen innovatsiialyq sheshimderdi oilap tapty. Joǵarǵy alańqaiǵa kóterilgende osy sheshimdermen qysqasha tanysýǵa bolady. Sonyń ishinde kún energiiasyn engizýge arnalǵan bastamalar, energiialyq tiimdilikpen salynǵan ǵimarattar jáne taǵy basqa jobalar bar. Budan bólek, taza tehnologiialardyń negizinde isteitin kompaniialardyń jumysy - energiiany taratý jáne qoldanýǵa qatysty tájiribesi tanystyrylady. Singapýrda oilastyrylǵan jáne júzege asyrylǵan sheshimder, joǵary tehnologiialyq kommýnikatsiialyq qurylǵylarmen kórsetiledi. Al jylyjai úlgisindegi terrariýmge kelýshiler tilek jazyp kete alady. Odan keiin sozylatyn atriýmda kitap oqýǵa, demalýǵa jáne oilanýǵa jaǵdai jasalady.
Singapýr pavilonynyń sáýletshisi - tanymal arhitektor Rendi Chen myrza. Pavilonnyń jalpy aýmaǵy - 385 sharshy metr. Pavilon EKSPO-2017 kórmesiniń resmi ashylýynan bir kún buryn, 2017 jyly 8 maýsymda ashylady. Ashylý saltanatynda horegrafiialyq ujymdar óner kórsetip, aldyn ala ekskýrsiia ótkiziledi. Sodan soń resmi qabyldaý uiymdastyrylady. Al 25 shildede Singapýrdyń ulttyq kúni atap ótiledi.
