Elordada AstanaArtFest festivali kezinde "Báiterek" monýmenti aldyndaǵy LED-displeiler arqyly "EKSPO-2017" kórmesiniń ashylý saltanaty tikelei efirde kórsetilmek. Bul týraly búgin Astana ákimdiginde Mádeniet basqarmasynyń basshysy Bolat Majaǵulov málim etti, dep xabarlaidy QazAqparat.
Basqarma basshysynyń sózinshe, Astanada "Nurjol" býlvarynda III halyqaralyq "AstanaArtFest-2017" art-festivali ótedi.
"Nurjol" býlvary AstanaArtFest festivaliniń óner kórmesine ainalady. Bul shara elorda turǵyndary men qonaqtarynyń eń súiikti festivaldarynyń biri. Eki jylda festivalge álemniń 10 memleketinen 78 myń súretshi qatyssa, ony tamashalaǵan kórermenniń sany jarty millionnan asyp ketti", - dedi Majaǵulov.
Onyń aitýynsha, festivalge dúniejúzinen kelgen qylqalam sheberlerimen qatar, dizainerler, arxitektorlar, mýzykanttar men rejisserler qatysady. Daiyn týyndylar 1 maýsymnan bastap ornatyla bastaidy, al festivaldiń ashylýy 10 maýsymǵa belgilenip otyr. Jalpy EKSPO-2017 kórmesi barysynda 647 mádeni shara ótkizilgeli otyr.
"Mádeni-kópshilik sharalar qalada jaz boiy ótetin bolady. Josparlanǵan sharalar túrli formattarda ótpek. Onda kontsertter, kórmeler, otbasylyq sharalar, teatrlandyrylǵan jáne tsirk qoiylymdary bolady. Al "EKSPO-2017" kórmesiniń ashylý men jabylý saltanattary "Báiterek" monýmenti, qalalyq alańda jáne "Stýdenttik" saiabaqta ornatylatyn úlken LED-displei arqyly tikelei efirde transliatsiialanady", - dedi ol.
