Elordasy Astana qalasynda ótip jatqan «Ekspo-2017» Halyqaralyq mamandandyrylǵan kórmesi aiasynda M.Áýezov atyndaǵy Qazaq Memlekettik akademiialyq drama teatry 18-25 maýsym aralyǵynda óner kórsetedi.
Tarihi jaǵdailardyń saldarynan Qazaqstanǵa jer aýdarylǵan túrli ult ókilderiniń taǵdyry sýretteletin dramatýrg Mádina Omarovanyń «Kómbe nannyń dámi» dramasy teatrdyń 91 maýsymynda Alma Kákishevanyń rejisserlik sheshimimen qalyń qaýymǵa jol tartqan. Atalǵan qoiylym búging «Ekspo-2017» kórme aiasynda astanalyqtar men alys-jaqyn shetelden kelgen qonaqtardyń nazaryna usynyldy.
«Kómbe nannyń dáminde» surapyl soǵys jyldary Qazaqstanǵa qonys aýdarylǵan ult pen ulystardyń kúndelikti ómiri men qazaq halqynyń qonaqjailylyǵy sýrettelip, olar bastan keshirgen qiyndyqtar arqyly oqiǵa jalǵasyn taýyp, ary qarai órbidi. Keńes ókimetiniń solaqai saiasaty tusynda jer aýdarylǵan halyqty syrtqa teppei, baýyrmaldylyq pen adamgershilik, meiirimdilik pen qamqorlyq tanytqan qazaq halqynyń igi isteri áspetteletin qoiylym, kórkemdik tutastyqta sheshilgen. Pesada da, qoiylymda da basty qaharman – halyq. Bir ǵana aýylda bolyp jatqan jaǵdai búkil respýblikany qamtyp, oiyn balalarynyń minez-qulqyna da áser etken.
Stsenografiialyq sheshim men akterlar keskindegen sheber beineler, mýzykalyq kórkemdeý men kásibi rejissýra úilesim tapqan qoiylymnyń kótergen taqyryby qashan da ózekti, qashan da ótkir.
