Burynǵy QR Qorǵanys ministri Sáken Jasuzaqov jańa qyzmetke taǵaiyndaldy, dep habarlaidy "Ult aqparat" Aqordaǵa silteme jasap.
"Memleket basshysynyń Ókimimen Sáken Ádilhanuly Jasuzaqov Qazaqstan Respýblikasynyń Tuńǵysh Prezidenti – Elbasy atyndaǵy Ulttyq qorǵanys ýniversitetiniń bastyǵy qyzmetine taǵaiyndaldy" delingen resmi habarlamada.
Qazaqstan Respýblikasy Qorǵanys ministri qyzmetin atqarǵan Sáken Ádilhanuly Jasuzaqov endi QR Tuńǵysh Prezidenti – Elbasy atyndaǵy Ulttyq qorǵanys ýniversitetin basqaratyn boldy.
Al, Tuńǵysh Prezidenti – Elbasy atyndaǵy Ulttyq qorǵanys ýniversitetiniń bastyǵy Ashat Naýryzbaiuly Ryspaev QR Memleket basshysynyń Ókimimen qyzmetinen bosatyldy.
Aita ketsek, Sáken Ádilhanuly Jasuzaqov 1957 jylǵy 25 qazanda Ońtústik Qazaqstan oblysynyń Shaldar keńsharynda týǵan. 1978 jyly Almaty joǵary jalpyáskeri komandalyq ýchilishesin bitirgen. Respýblika Qarýly Kúshteriniń qalyptasýy men damýyna, sondai-aq táýelsiz Qazaqstannyń qorǵanys qabiletiniń nyǵaiýyna laiyqty úles qosa otyryp, leitenanttan bastap generalǵa deiingi áskeri qyzmettiń barlyq satylarynan ótken.
1987 jyldyń qyrkúiegi men 1990 jyldyń maýsymy aralyǵynda M.V. Frýnze atyndaǵy áskeri akademiiada tyńdaýshy. Odan soń Almaty qalasy, Alataý aýdandyq azamattyq qorǵanys bastyǵynyń orynbasary – shtab bastyǵy laýazymynda boldy.
1994 jylǵy shildede RF QK Bas shtabynyń Áskeri akademiiasyna oqýǵa tústi.
1996 jyly atalǵan akademiiany bitirip, Qazaqstan Respýblikasy Qarýly Kúshteri Bas shtaby bastyǵynyń orynbasary boldy. Jedel josparlaý departamentin basqardy. Odan soń Qazaqstan Respýblikasy Qarýly Kúshteri Bas shtaby bastyǵynyń jedel jumystar jónindegi orynbasary laýazymynda boldy. Keiinirek armiia korpýsynyń shtab bastyǵy, Utqyr kúshterdiń qolbasshysy laýazymdarynda boldy.
2003 jyly Bas shtab bastyǵy – Qazaqstan Respýblikasy Qarýly Kúshteri Qurlyq áskerleri bas qolbasshysynyń birinshi orynbasary qyzmetine taǵaiyndaldy. Odan soń «Shyǵys» óńirlik qolbasshylyǵy áskerleriniń qolbasshysy boldy.
2007 jylǵy sáýir aiynda QR QM Shtabtar bastyqtary komiteti tóraǵasynyń birinshi orynbasary laýazymyna taǵaiyndaldy.
2009 jyly sáýir aiynda Memleket basshysynyń Ókimimen Qazaqstan Respýblikasy Qarýly Kúshteri Qurlyq áskerleriniń bas qolbasshysy bolyp taǵaiyndaldy.
2010 jylǵy naýryz aiynan bastap 2013 jylǵy 22 qańtarǵa deiin Qorǵanys ministriniń birinshi orynbasary – Qazaqstan Respýblikasy Qorǵanys ministrligi Shtabtar bastyqtary komitetiniń tóraǵasy laýazymyn atqardy.
2013 jylǵy 22 qańtarda Qazaqstan Respýblikasy Prezidentiniń Ókimimen Qazaqstan Respýblikasy Qorǵanys ministriniń birinshi orynbasary - QR QK Bas shtabynyń bastyǵy bolyp taǵaiyndaldy.
2016 jylǵy 13 qyrkúiekte Qazaqstan Respýblikasy Prezidentiniń Jarlyǵymen Qazaqstan Respýblikasynyń Qorǵanys ministri bolyp taǵaiyndaldy.
«Qyzyl Juldyz», III dárejeli «QSRO QK-degi Otanǵa qyzmeti úshin», II dárejeli «Danq», II dárejeli «Áýlie kniaz Aleksandr Nevskii» jáne ár túrli dárejedegi 21 medalmen nagradtalǵan.
1981-1983 jyldar aralyǵynda ADR jaýyngerlik qimyldarǵa qatysqan.
1993-1994 jyldary Tájikstan Respýblikasynda bitimgerlik missiia atqardy.
