Foto: Tengrinews.kz
Burynǵy densaýlyq saqtaý ministri Eljan Birtanov sotta taraptardyń jaryssózi barysynda málimdeme jasady, - dep habarlaidy Massaget.kz portaly.
Eks-ministr eki is boiynsha aiyptalyp otyr. Birinshiden, Birtanov pen onyń burynǵy orynbasary Oljas Ábishevke Densaýlyq saqtaý ministrligi jumys istemeitin aqparattandyrý platformasyn jumysqa qabyldaý jáne paidalanýǵa berý arqyly laýazymdyq ókilettikterin asyra paidalandy degen aiyp taǵylǵan. Al, ekinshisi - 2020 jylǵy maýsymda Tarazdan COVID-19 juqtyrdy degen kúdikpen Astanaǵa qaitqan kezinde sanaviatsiia bortyn paidalanǵanyna qatysty.
"Sot tergeýi barysynda platformaǵa qatysty ári sanitarlyq aviatsiiaǵa qatysty meni aiyptaityn eshqandai dálel keltirilgen joq. Qylmys týraly derekter usynylmady. Sonyń ishinde laýazymdyq mindetterimdi teris paidalaný týraly - qandai laýazymdyq mindetterdi teris paidalandym, qandai formada paidalandym degen nárseler usynylmady. Aiypty jariialaǵan kezde túsindirilýin suradym. Normativtik-quqyqtyq bazada bekitilgenderdiń ishinen densaýlyq saqtaý ministriniń ókilettigin aiyptaý kezinde osy tarmaqtardyń eshqaisy naqty qai quqyqty durys paidalanbaǵanymdy kórsetpeidi", - dedi eks-ministr.
Eljan Birtanov bul is boiynsha barlyq buiryqqa óziniń laýazymdyq mindetterine sáikes qol qoiǵanyn málimdedi.
"Aiyptaý aktisinde bastapqyda memlekettik qyzmetshiniń imidjin jasaý maqsaty málimdelgen bolsa, jeke qyzyǵýshylyǵym qandai bolǵany týraly negizdeme usynylmady. Meniń oiymsha, memlekettik aiyptaý is materialdarynda bul rastalmady. Iaǵni, platforma isindegi jáne sanaviatsiia isindegi meniń maqsatym týraly eshqandai dálel keltirilgen joq. Is jan-jaqty emes, iaǵni qylmystyń egjeii-tegjeii joq. Buiryqtarǵa qol qoiǵanym aiyptaldy, boldy. Shyn máninde, basqa oqiǵalarǵa qatysym joq, basqa áreketter jasamadym", - dedi ol.
Sanaviatsiiaǵa qatysty jaǵdaidy túsindirgen Birtanov sol sátte óziniń jaǵdaiynyń nasharlaǵanyn sezgenin málimdedi. Burynǵy ministr Astanaǵa úkimettik bortpen ushýy kerek edi, biraq ol kezde premer-ministrmen, Úkimettiń qalǵan múshelerimen bailanysýǵa májbúr bolar edi. Óziniń aitýynsha, áriptesterine aýrý juqtyrýdan qoryqqan, sondyqtan oqshaýlanyp, sanaviatsiia bortyn shaqyrtqan.
"Úkimettik ushaq áldeqaida yńǵaily. Úkimettik delegatsiia quramynda óz betinshe ushyp ketý ádeti joq. Tipti múmkin emes. Premer-ministrdiń qaramaǵynda bortta kim ushatyny jáne kim oralatyny naqty jazylǵan. Bulai ushý qylmys emes. Ol úshinshi tulǵalardy qorǵaý maqsatynda memleket múddesi úshin júzege asyryldy", - dedi ol.
Sotta Birtanov keltirilgen zalalmen kelispeitinin málimdedi.
"Meniń oiymsha, platforma isi boiynsha eshqandai zalal keltirilgen joq. Platforma baǵalanǵan qunyna sáikes, litsenziia men jumys Densaýlyq saqtaý ministrliginiń balansyna materialdyq emes aktiv retinde qabyldandy. Jumystar óz deńgeiinde oryndaldy", - dedi eks-ministr.
Aita keteiik, 2020 jylǵy 25 maýsymda Eljan Birtanov densaýlyq saqtaý ministri qyzmetinen bosatyldy. DSM-nyń burynǵy basshysy 2020 jylǵy qarashadan beri úiqamaqta otyr.
