فوتو: Tengrinews.kz
بۇرىنعى دەنساۋلىق ساقتاۋ مينيسترٸ ەلجان بٸرتانوۆ سوتتا تاراپتاردىڭ جارىسسٶزٸ بارىسىندا مەلٸمدەمە جاسادى, - دەپ حابارلايدى Massaget.kz پورتالى.
ەكس-مينيستر ەكٸ ٸس بويىنشا ايىپتالىپ وتىر. بٸرٸنشٸدەن, بٸرتانوۆ پەن ونىڭ بۇرىنعى ورىنباسارى ولجاس ەبٸشەۆكە دەنساۋلىق ساقتاۋ مينيسترلٸگٸ جۇمىس ٸستەمەيتٸن اقپاراتتاندىرۋ پلاتفورماسىن جۇمىسقا قابىلداۋ جەنە پايدالانۋعا بەرۋ ارقىلى لاۋازىمدىق ٶكٸلەتتٸكتەرٸن اسىرا پايدالاندى دەگەن ايىپ تاعىلعان. ال, ەكٸنشٸسٸ - 2020 جىلعى ماۋسىمدا تارازدان COVID-19 جۇقتىردى دەگەن كٷدٸكپەن استاناعا قايتقان كەزٸندە ساناۆياتسييا بورتىن پايدالانعانىنا قاتىستى.
"سوت تەرگەۋٸ بارىسىندا پلاتفورماعا قاتىستى ەرٸ سانيتارلىق اۆياتسيياعا قاتىستى مەنٸ ايىپتايتىن ەشقانداي دەلەل كەلتٸرٸلگەن جوق. قىلمىس تۋرالى دەرەكتەر ۇسىنىلمادى. سونىڭ ٸشٸندە لاۋازىمدىق مٸندەتتەرٸمدٸ تەرٸس پايدالانۋ تۋرالى - قانداي لاۋازىمدىق مٸندەتتەردٸ تەرٸس پايدالاندىم, قانداي فورمادا پايدالاندىم دەگەن نەرسەلەر ۇسىنىلمادى. ايىپتى جارييالاعان كەزدە تٷسٸندٸرٸلۋٸن سۇرادىم. نورماتيۆتٸك-قۇقىقتىق بازادا بەكٸتٸلگەندەردٸڭ ٸشٸنەن دەنساۋلىق ساقتاۋ مينيسترٸنٸڭ ٶكٸلەتتٸگٸن ايىپتاۋ كەزٸندە وسى تارماقتاردىڭ ەشقايسى ناقتى قاي قۇقىقتى دۇرىس پايدالانباعانىمدى كٶرسەتپەيدٸ", - دەدٸ ەكس-مينيستر.
ەلجان بٸرتانوۆ بۇل ٸس بويىنشا بارلىق بۇيرىققا ٶزٸنٸڭ لاۋازىمدىق مٸندەتتەرٸنە سەيكەس قول قويعانىن مەلٸمدەدٸ.
"ايىپتاۋ اكتٸسٸندە باستاپقىدا مەملەكەتتٸك قىزمەتشٸنٸڭ يميدجٸن جاساۋ ماقساتى مەلٸمدەلگەن بولسا, جەكە قىزىعۋشىلىعىم قانداي بولعانى تۋرالى نەگٸزدەمە ۇسىنىلمادى. مەنٸڭ ويىمشا, مەملەكەتتٸك ايىپتاۋ ٸس ماتەريالدارىندا بۇل راستالمادى. ياعني, پلاتفورما ٸسٸندەگٸ جەنە ساناۆياتسييا ٸسٸندەگٸ مەنٸڭ ماقساتىم تۋرالى ەشقانداي دەلەل كەلتٸرٸلگەن جوق. ٸس جان-جاقتى ەمەس, ياعني قىلمىستىڭ ەگجەيٸ-تەگجەيٸ جوق. بۇيرىقتارعا قول قويعانىم ايىپتالدى, بولدى. شىن مەنٸندە, باسقا وقيعالارعا قاتىسىم جوق, باسقا ەرەكەتتەر جاسامادىم", - دەدٸ ول.
ساناۆياتسيياعا قاتىستى جاعدايدى تٷسٸندٸرگەن بٸرتانوۆ سول سەتتە ٶزٸنٸڭ جاعدايىنىڭ ناشارلاعانىن سەزگەنٸن مەلٸمدەدٸ. بۇرىنعى مينيستر استاناعا ٷكٸمەتتٸك بورتپەن ۇشۋى كەرەك ەدٸ, بٸراق ول كەزدە پرەمەر-مينيسترمەن, ٷكٸمەتتٸڭ قالعان مٷشەلەرٸمەن بايلانىسۋعا مەجبٷر بولار ەدٸ. ٶزٸنٸڭ ايتۋىنشا, ەرٸپتەستەرٸنە اۋرۋ جۇقتىرۋدان قورىققان, سوندىقتان وقشاۋلانىپ, ساناۆياتسييا بورتىن شاقىرتقان.
"ٷكٸمەتتٸك ۇشاق ەلدەقايدا ىڭعايلى. ٷكٸمەتتٸك دەلەگاتسييا قۇرامىندا ٶز بەتٸنشە ۇشىپ كەتۋ ەدەتٸ جوق. تٸپتٸ مٷمكٸن ەمەس. پرەمەر-مينيستردٸڭ قاراماعىندا بورتتا كٸم ۇشاتىنى جەنە كٸم ورالاتىنى ناقتى جازىلعان. بۇلاي ۇشۋ قىلمىس ەمەس. ول ٷشٸنشٸ تۇلعالاردى قورعاۋ ماقساتىندا مەملەكەت مٷددەسٸ ٷشٸن جٷزەگە اسىرىلدى", - دەدٸ ول.
سوتتا بٸرتانوۆ كەلتٸرٸلگەن زالالمەن كەلٸسپەيتٸنٸن مەلٸمدەدٸ.
"مەنٸڭ ويىمشا, پلاتفورما ٸسٸ بويىنشا ەشقانداي زالال كەلتٸرٸلگەن جوق. پلاتفورما باعالانعان قۇنىنا سەيكەس, ليتسەنزييا مەن جۇمىس دەنساۋلىق ساقتاۋ مينيسترلٸگٸنٸڭ بالانسىنا ماتەريالدىق ەمەس اكتيۆ رەتٸندە قابىلداندى. جۇمىستار ٶز دەڭگەيٸندە ورىندالدى", - دەدٸ ەكس-مينيستر.
ايتا كەتەيٸك, 2020 جىلعى 25 ماۋسىمدا ەلجان بٸرتانوۆ دەنساۋلىق ساقتاۋ مينيسترٸ قىزمەتٸنەن بوساتىلدى. دسم-نىڭ بۇرىنعى باسشىسى 2020 جىلعى قاراشادان بەرٸ ٷيقاماقتا وتىر.
