Qarjylyq monitoring agenttiginiń tóraǵasy Janat Elimanov elden qolma-qol valiýtany zańsyz shyǵarýǵa qatysty pikir bildirdi, dep habarlaidy QazAqparat.
«Múddeli qyzmettermen birlesip qolma-qol valiýtany zańsyz áketýge baqylaý kúsheitildi, 4,9 mln AQSh dollary somasyna 36 fakt anyqtaldy», - dedi J. Elimanov depýtatattyq saýalǵa jaýap bere otyryp.
Onyń aitýynsha, kapitaldyń elden áketilýi týraly máseleni qaraý kezinde kásipkerlerdiń ádettegi iskerlik belsendiligimen nemese eldegi ekonomikalyq jaǵdaimen bailanysty kapitaldyń áketilýin, sondai-aq kóbinese qylmystyq qyzmetpen bailanysty kapitaldyń zańsyz shyǵarylýyn ajyratý qajet.
«Qazirgi ýaqytta ofshorlardy ielený qazaqstandyq zańnamaǵa qaishy kelmeidi. Syrtqy ekonomikalyq qyzmet aiasynda elden tys jerlerge aqsha aýdarýdyń kóptegen zańdy negizderi bar, mysaly, rezident emes quryltaishylarǵa dividendter tóleý túrinde. Birqatar kásiporyndar óz qyzmetiniń sipatyna qarai sheteldik bankterge aqsha ornalastyrady», - dedi agenttik basshysy.
Buǵan deiin habarlanǵandai, Janat Elimanov biyl Qazaqstannan shetelge aýarylǵan qarajattyń somasy 30 paiyzǵa az bolǵanyn aitty.
Aita keteiik, biyl aqpan aiynyń basynda Májilis depýtattary qańtardaǵy qaiǵyly oqiǵalar kezinde Qazaqstannan shetelge qandai kólemde qarjy shaǵarylǵanyn anyqtaý úshin saýal joldaǵan bolatyn.
Bul depýtattyq saýalda sońǵy 25 jylda Qazaqstannan sheteldik ofshorlarǵa shamamen 140-160 milliard AQSh dollary shyǵarylǵany atap ótilgen.
