Ekologiia, geologiia jáne tabiǵi resýrstar ministrliginiń ókilderi Nur-Sultan qalasyna jaqyn jerdegi stihiialyq qoqystarǵa reid júrgizdi. Mundai reidter búkil elde ótkizilmek, dep habarlaidy "Ult aqparat" ministrliktiń baspasóz qyzmetine silteme jasap.
Ministrlikke qarasty ekologiia, geologiia jáne tabiǵi resýrstar komitetiniń tóraǵasy Zulfyhar Joldasov Memleket basshysynyń stihiialyq qoqys úiindilerin joiý týraly tapsyrmasyn oryndaýdyń mańyzyn atap ótti.
Eske salsaq, biylǵy 10 shildede úkimettiń keńeitilgen otyrysynda QR Prezidenti Qasym-Jomart Toqaev kún ótken saiyn kúrdelenip otyrǵan ekologiialyq problemalardy sheshýdiń ózektiligin jetkizgen bolatyn.
«Jyl saiyn 5 mln tonnadan asa qatty turmystyq qaldyqtar shyǵarylady. Olardy óńdeý kólemi - elimiz boiynsha tek 15% ǵana. Bul - jetkiliksiz. Úkimetke jedel túrde zańnamalyq baza ázirlep, «Waste to energy» tehnologiiasyn engizý úshin qolaily investitsiialyq jaǵdai týǵyzý qajet, - dep málimdedi Qasym-Jomart Toqaev.
Al ótken aptada ekologiia ministrligi ár óńirdegi stihiialyq úiindiler týraly azamattardan aqparat jinaý úshin jedel jelini iske qosqan bolatyn. Búginde 250-den asa shaǵym kelip túsken. Shaǵymnyń kóbi - Almaty oblysy (40 shaǵym), Almaty qalasy (apta ishinde - 18 habarlama), Aqtóbe, Aqmola jáne Shyǵys Qazaqstan oblystaryndaǵy qoqys úiindileri týraly. Úiilgen qoqys týraly eń kóp habar bergen - Qaraǵandy (15) jáne Aqtóbe (14) oblysynyń, sondai-aq Almaty qalasynyń (11) turǵyndary.
Ekologiia ministrligi habarlaǵandai, jyl basynan beri tapsyrys boiynsha Qazaqstannyń iri qalalary men onyń 50 shaqyrym aýmaǵyndaǵy óndiris jáne tutyný qaldyqtaryna ǵaryshtyq monitoring júrgizilgen. Osynyń nátijesinde búkil el boiynsha 7 myńnan astam zańsyz qoqys oryndary anyqtaldy.
Ǵarysh monitoringi kezinde ministrlik óńirlerdegi úiindilerdi joiýdyń jańa kestesin jasap, bekitý úshin ákimdikterge joldady. Búginde onyń 18-i joiyldy.
Jedel jeli nómiri: +77759524900.
