Ekologiia, geologiia jáne tabiǵi resýrstar ministri Maǵzum Myrzaǵaliev Ekologiialyq kodeks jobasy aiasynda eń ozyq tehnologiialardy engizgen kásiporyndardy emissiialyq tólemderden bosatýdy usyndy, dep habarlaidy QazAqparat.
«Zań jobasynda Salyq kodeksine jáne Salyq kodeksin qoldanysqa engizý týraly zańǵa kelesidei máseleler boiynsha túzetýler kózdelgen. Eń ozyq qoljetimdi tehnologiiany engizý arqyly keshendi ekologiialyq ruqsatty alǵan jańa nysandardyń operatorlaryna qatysty emissiia úshin tólenetin tólemderden bosatý boiynsha tiisti túzetýler usynyldy. Sonymen qosa qoldanystaǵy kásiporyndar úshin de osyndai tetik qarastyrylǵan. Emissiia úshin tólenetin tólemderden bosatylýy úshin olar ekologiialyq tiimdilikti arttyrý men eń ozyq qoljetimdi tehnologiiany engizý baǵdarlamasyn ázirlep, ony júzege asyrýy qajet», - dedi Parlament Májilisinde Maǵzum Myrzaǵaliev.
Onyń aitýynsha keshendi ekologiialyq ruqsatty almaǵan birinshi sanattaǵy qoldanystaǵy nysandar boiynsha qorshaǵan ortany lastaǵany úshin tólemaqy mólsherine 2, 4 jáne 8 ese ulǵaitylǵan koeffitsientter qoldanylady.
«Buny keshendi ekologiialyq ruqsatqa kóshýdi yntalandyratyn qosymsha bir shara retinde qarastyramyz. Bul rette birinshi sanattaǵy 50 iri kásiporyndar úshin mundai ulǵaitý 2025 jyldan, al birinshi sanattaǵy qalǵan nysandar úshin 2031 jyldan bastalady. Aita keterligi, 3 jyl saiyn ulǵaitý koeffitsientteri 2 eselenip turady. Iaǵni, búgingi tańda jumys istep turǵan árbir iri kásiporyn erteń óz erkimen tańdaý jasaidy. Ne osy qalpynda qorshaǵan ortaǵa keri áser etip, jyldar saiyn eselenetin ekologiialyq tólem tóleidi. Bolmasa eń ozyq qoljetimdi tehnologiiany engizip, lastaýshy keipinen arylyp, emissiia úshin tólenetin tólemderden bosatylady», - dedi ol.
Zań jobasy sheńberinde jergilikti máslihattardyń qorshaǵan ortaǵa teris áser etkeni úshin emissiia úshin tólenetin tólemaqy 2 esege ulǵaitý jónindegi quzyretin alyp tastaityn túzetý usynylǵan. Sebebi dál osy zań jobasynda ekologiialyq tólemaqynyń bazalyq stavkasy 2 ese ulǵaitylǵan. Bul degenimiz, burynǵy emissiia úshin tólenetin 2 eselengen tólemaqy men jańadan engizilgen 2 eselengen bazalyq stavka somasy birdei degen sóz.
