Ekologiia, geologiia jəne tabiǵi resýrstar ministrliginiń baspasóz hatshysy Samal Ibraeva Almatydaǵy Býtakov shatqalynda aǵashtardyń kesilýine qatysty túsinik berdi, dep habarlaidy "Ult aqparat".
«Maǵan birneshe BAQ ókili habarlasyp, Býtakov shatqalyndaǵy aǵashtardyń kesilýine qatasty jaǵdaidy túsindirýimdi surady. Bul taqyryp jyl boiy birneshe ret kóterilgen. Zańǵa səikes, memlekettik ulttyq tabiǵi saiabaqtarda aǵash tek orman qorǵaý is-sharalaryn júzege asyrýǵa qajet sanitarlyq maqsatta ǵana kesiletinin eske salǵym keledi. Ol ýəkiletti organnyń ruqsatymen memlekettik ekologiialyq saraptamanyń oń tujyrymy boiynsha júrgiziledi», - dep jazdy Samal Ibraeva Facebook-tegi paraqshasynda.
Baspasóz hatshysynyń jazýynsha, Býtakov shatqalynda memlekettik ekologiialyq saraptamanyń oń tujyrymymen Orman sharýashylyǵy jəne janýarlar dúniesi komiteti tóraǵasynyń buiryǵy negizinde sanitarlyq aǵash kesý jumysy júrgizilip jatyr. Atap aitqanda, shatqaldaǵy aǵashtardy kesý shyrshaly syldyrshóp jəne diń shirigimen kúres maqsatynda qajet.
«Orman patologiiasyn tekserýdi 2015 jyly «Botanika institýty» RMM jəne «Ósimdik qorǵaý jəne karantin institýty» RMM júrgizgen bolatyn. Memlekettik ekologiialyq saraptama alý kezinde qoǵamdyq tyńdaýlar ótkizilip, ol BAQ-ta jariialandy. Ormanshylardyń aitýynsha, jappai sanitarlyq aǵash kesý ziiankestermen kúreste jəne aǵash aýrýlary órshigen kezde, orman órti nemese ózge de túrli qolaisyz tabiǵat qubylystary oryn alǵan kezde búlingen toǵaidy tazartý maqsatynda júrgiziledi. Ol orman alqabyn tazartyp, orman ósimdikterin egýge nemese onyń tabiǵi jolmen jańarýyna qolaily jaǵdai týǵyzýǵa baǵyttalǵan», - deidi Samal Ibraeva.
Eske sala ketsek, jyl basynda Almatydaǵy Býtakov shatqalynda 8 gektar aýmaqtyń aǵashy kesiletini habarlanǵan bolatyn.
