«Qaharmandar» qoǵamdyq qorynyń prezidenti Sabyr Qasymov Memleket basshysy Qasym-Jomart Toqaevtyń Saiasi qýǵyn-súrgin jáne asharshylyq qurbandaryn eske alý kúnine orai jariialaǵan úndeýine pikir bildirdi, dep habarlaidy QazAqparat tilshisi.
«Qazaqstan Prezidenti Qasym-Jomart Toqaevtyń úndeýinde saiasi qýǵyn-súrgin qurbandaryn aqtaý úshin arnaiy memlekettik komissiia qurýdy tapsyrǵany óte oryndy dúnie boldy. Muny jalpy qazaq qoǵamy, ziialy qaýym, tarihshylar men ólketanýshylar, tutastai alǵanda ultjandy azamattar kópten beri kútken edi. Memleket basshysynyń bul sheshimi óziniń saiasi reformalarynyń, «halyq únine qulaq asatyn memleket» tujyrymdamasynyń zańdy jalǵasy ispetti. Qasym-Jomart Kemeluly «Egemen Qazaqstan» gazetine bergen suhbatynda «Jańa syn-synaqqa tótep berý úshin, eń aldymen, ulttyq qundylyqtardy qorǵai bilgen jón» degen bolatyn. Demek, Prezidenttiń sońǵy úndeýi de, komissiia qurý týraly sheshimi de dál osy baǵytta jasalyp otyr dep bilemin», - dedi ol.
Sonaý 1991 jyldyń qarashasynda Qazaqstan Respýblikasy Joǵarǵy Keńesi Qazaqstandaǵy saiasi qýǵyn-súrgin jáne jappai asharshylyqtyń sebepteri men zardaptaryn arnaiy saraptaýdan ótkizý maqsatynda Parlamenttik arnaiy komissiia qurǵan bolatyn. Joǵary Keńes depýtaty Manash Qozybaev basshylyq jasaǵan atalǵan komissiia quramynda jumys istegen Sabyr Qasymov sol ýaqytta jumystyń atqarylǵanymen kemshilikterdiń de oryn alǵandyǵyn aitady.
«Ol ýaqyt Táýelsizdigimizdi alyp, «bórkimizdi aspanǵa atyp jatqan» sát bolatyn. Ókinishke qarai 1993 jylǵy «Jappai saiasi qýǵyn-súrgin qurbandaryn aqtaý týraly» zańnyń negizgi jerlerin kórshi Resei elinen kóshirip ala salǵan. Qazaqtyń ulttyq ereksheligin, Qazaqstanda bolǵan qýǵyn-súrginniń Reseide bolmaǵandyǵyn aityp, zańdy ózimiz jasaýdy usynǵan edik. Tipti, Manash Qozybaev basqarǵan komissiianyń usynystaryn sol kezdegi Joǵarǵy Keńes depýtattary zańǵa kirgizbei qoidy. Óitkeni, qazaqtyń teń jartysy qyrylyp qaldy», - dedi Sabyr Qasymov.
«Qaharmandar» qoǵamdyq qorynyń prezidenti Ekinshi dúniejúzilik soǵys kezinde nemisterdiń qolyna tutqyn bolǵan otandastarymyzdyń da áli kúnge aqtalmai kele jatqandyǵyna qynjylys bildiredi.
«1995 jyly Reseidiń sol kezdegi Prezidenti Boris Eltsinniń Jarlyǵymen soǵys kezinde áskeri tutqyn bolǵan reseilikterdiń barlyǵy aqtaldy. Al biz osy kúnge deiin soǵys kezinde tutqyn bolǵan azamattarymyzdyń aqtai almai kelemiz. Tarihty qaita jazý oiymyzda joq. Biraq, bul áskeri tutqyndar aqtalýy tiis», - dedi ol.
