Sabaq berý barysynda úsh jastaǵy balany jelkesinen uryp jibergen defektolog óziniń esebinen eńbek demalysyna shyǵýǵa ótinish jazdy, dep habarlaidy Ult.kz tilshisi QazAqparat agenttigine silteme jasap.
«Úsh jastaǵy Iýriige sabaq berý barysynda pedagogikalyq ádis retinde jelkesinen uryp jibergen mamannyń balaǵa zorlyq-zombylyq kórsetpek turmaq tipti qol ushyn tigizýge de quqy joq. Qazirgi ýaqytta ol óziniń esebinen eńbek demalysyna shyǵýǵa ótinish jazdy. Eńbek demalysynan shyqqannan keiin bul jaitty qarastyrý qajet dep sanaimyn. Eger adam balaǵa qatysty mundai qylyqqa baratyn bolsa, onda biz onyń qyzmetine sáikestigi týraly máseleni qaraity bolamyz», - dedi Ekibastuz qalalyq bilim basqarmasynyń jetekshisi Nurjamal Maqumova.
Pedagog jeke ońaltý ortalyǵynda jumys isteidi. Sheneýnikterdiń aitýynsha, bul oqiǵa sabaq ýaqytynan tys mezgilde, bala ata-anasymen birge turatyn páterde oryn alǵan. Sondyqtan bul jaǵdaiǵa ata-ana men pedagog arasyndaǵy jeke qarym-qatynas retinde baǵa berýde.
«Ol tájiribeli defektolog, tájiribesi óte mol. Pedagogikalyq turǵyda alǵanda onyń balaǵa zorlyq-zombylyq kórsetýge eshqandai quqyǵy joq. Bul bul jait jeke sipatta bolyp otyr. Sondyqtan biz qandai da bir shara qabyldai almaimyz. Eger bul jait bizdiń mekemede oryn alǵanda qandai da bir shara qabyldar edik. Menińshe, ata-ana men pedagog arasynda kelisimshart ta joq. Balanyń denesinde kúsh kórsetý áreketteriniń belgileri joq. Degenmen, ol jeńildetip aitqanda balany túrtip qalǵan. Sondyqtan faktini tek sotta ǵana dáleldeýge bolady. Al endi muny ata-ananyń qalaýy biledi. Anasy azamattyq sotqa júginýge tolyq quqy bar», - dedi Ekibastuz qalalyq bilim bóliminiń basshysy.
Esterińizge sala ketsek, muǵalimniń úsh jastaǵy balany jelkesinen nuqyp qalǵany beinelengen video el turǵyndarynyń ashýyn týǵyzǵan bolatyn. Oqiǵa Ekibastuz qalasynda oryn alǵan. Muǵalim balaǵa sabaq berip jatqan kezde onyń anasy men ájesi kórshi bólmede otyrǵan.
