Foto: Tengrinews.kz
Ekibastuzda jylytqyshtardy tegin taratý kezindegi dúrbeleń videoǵa túsirildi. Turǵyndar qystyrylyp, qart áieldi taptap kete jazdaǵan, - dep habarlaidy Tengrinews.kz agenttigi.
Bul týraly Instagram jelisinde pavlodarlyq kásipker aityp berdi. Ol qazaqstandyqtardyń aqshasyna 106 jylytqysh satyp alyp, ony páterinde tońyp jatqan turǵyndarǵa taratý úshin Ekibastuzǵa kelgenin aitty.
Tegin jylytqyshty alyp qalýǵa tyrysqan jurtty oqiǵa kýágerleri videoǵa túsirip alǵan. Instagram-da oqiǵanyń videosy jariialandy.
"Sabyrly bolýdy suradym, biraq nátije bolmady, taratý múmkin bolmady. Buǵan biz kináli emespiz. Adamdar dúrbeleń týǵyzdy. Bir ájeni shyǵaryp aldym, taptap kete jazdady", - dedi kásipker.
Ol dúrbeleń týdyrǵany úshin keshirim de surady. Er adam jylytqyshtardy tegin taratatynyn aldyn ala habarlaǵanyn, biraq mundai jaǵdai bolady dep oilamaǵanyn aitty.
"Ekibastuzda dúrbeleń týǵyzǵanymyz úshin keshirim suraimyn. Qorshaý ornatyp, eshkimniń zardap shegýine jol bermegen politsiia qyzmetkerlerine alǵys aitamyz. Adam kóp boldy", - dedi kásipker.
Aita keteiik, qalada jylýmen qamtýǵa bailanysty tótenshe jaǵdai áli alynǵan joq. Keshe túnnen beri Ekibastuzda vitse-premer Serik Jumanǵarin men tótenshe jaǵdailar ministri Iýrii Ilin júr.
Eske salaiyq, eki táýlik boiy apat saldarynan birneshe kópqabatty jáne jeke turǵyn úi, birqatar áleýmettik nysan jylýsyz qalyp, 123 turǵyn, onyń ishinde balalar da evakýatsiialanǵan bolatyn. Bilim berý nysandary qashyqtyqtan oqytý formatyna kóshti, balabaqshalardyń jumysy toqtatyldy.
