Qala politseileri keiingi kúnderi karantin tártibin buzý týraly jinalǵan materialdardy Qalalyq taýarlar men kórsetiletin qyzmetterdiń sapasy men qaýipsizdigin baqylaý basqarmasyna jiberdi, dep habarlaidy "Ult aqparat".
«Baqylaý toby altynshy qarashada, saǵat 17:45-ter shamasynda Ekibastuz qalasy Abai kóshesindegi «Báiterek» meiramhanasynyń banket zalynda otbasylyq toi bolyp jatqanyn anyqtady. Toiǵa 60-tan astam adam qonaq bolǵan. Qonaqtardyń bárin mekemeden shyǵaryp, meiramhana direktoryna QR ÁQBtK 425-baby birinshi bóligi boiynsha ákimshilik hattama toltyryldy», - dep habarlady tilshilerge Pavlodar oblystyq Politsiia departamentiniń baspasóz qyzmeti.
Mekeme tartqan málimetterge qaraǵanda, aimaqta karantin erejesin saqtaýdy baqylaý sharalary jalǵasyp jatyr. Negizgi mindet – koronavirýs infektsiiasynyń taralýyn boldyrmaý jáne azaitý úshin sanitariialyq-epidemiialogiialyq talaptardyń oryndalýyn qadaǵalaý.
«Jetinshi qarashada Júsip kóshesindegi «Piramisa» saýda úiinde «Planeta odejdy» bóliminiń jumys istep jatqany belgili boldy. Tyiym salynǵanyna qaramastan, satýshylar demalys kúnderi jumysqa shyqqan», - dep tolyqtyrdy departamenttegiler.
Jinalǵan materialdar sheshim qabyldaý úshin Ekibastuz qalasynyń Taýarlar men kórsetiletin qyzmetterdiń sapasy men qaýipsizdigin baqylaý basqarmasyna jiberildi.
«Azamattardyń densaýlyǵy óte mańyzdy. Karantin tártibin saqtamaityn adamdar jaýapqa tartylady, sebebi olar ózine ǵana emes, ainalasyna da qaýip tóndiredi», - dep málimdedi Pavlodar oblystyq politsiia departamenti basshysynyń birinshi orynbasary Jasqairat Qaiyrov.
