Foto: Gov.kz
Ekibastuz qalasy ekonomikany tabysty ártaraptandyrý nátijesinde monoqalalar tizbesinen shyǵaryldy, dep habarlaidy Ult.kz.
Tiisti sheshimdi QR Ulttyq ekonomika ministrligi qabyldap, monoqalalar tizbesine ózgerister engizdi. Bul jańartý Memleket basshysynyń 2024 jylǵy Joldaýynda berilgen tapsyrmalardy oryndaý aiasynda júzege asqan.
Jańa buiryqqa sáikes, 2026 jylǵy 10 naýryzda qabyldanǵan qujat negizinde Ekibastuz resmi túrde monoqala sanatynan shyǵaryldy.
Ministrlik júrgizgen keshendi taldaý barysynda 78 negizgi kórsetkish qarastyrylǵan. Olardyń qatarynda ónerkásip óndirisiniń serpini, investitsiialyq belsendilik, kásipkerliktiń damýy jáne jumyspen qamtý qurylymy bar.
Nátijesinde Ekibastuz ekonomikasynyń bir ǵana salaǵa táýeldilikten arylyp, turaqty ártaraptandyrý jolyna túskeni anyqtalǵan. Qalada ónerkásip kólemi artyp, investitsiia tartý qarqyny kúsheigen.
2025 jyldyń qorytyndysy boiynsha ónerkásip óndirisiniń kólemi 1,6 trln teńgeden asyp, bir jyl ishinde 28,1%-ǵa ósken. Al negizgi kapitalǵa salynǵan investitsiia 429,8 mlrd teńgege jetip, ótken jylmen salystyrǵanda 1,2 esege artqan.
Sonymen qatar, jumyspen qamtý birneshe sala arasynda teń bólinip, qala quraýshy bir kásiporynǵa táýeldilik tómendegen. Bul monoqalaǵa tán belgilerdiń joiylǵanyn kórsetedi.
Jańartylǵan tizimde 19 monoqala qaldy. Olardyń qatarynda Temirtaý, Jańaózen, Rýdnyi, Balqash jáne basqa qalalar bar. Osylaisha, elimizdegi monoqalalar sany 20-dan 19-ǵa deiin qysqardy.
Sarapshylardyń pikirinshe, Ekibastuzdyń tizimnen shyǵýy – qalanyń ekonomikalyq transformatsiiasynyń aiqyn dáleli. Bul kásipkerlikti damytý, investitsiia tartý jáne ekonomikany ártaraptandyrý baǵytyndaǵy júieli jumystyń nátijesi sanalady.
