Aqmola oblysynda eki politsiia qyzmetkeriniń ólimine qatysty is sotqa joldandy, dep habarlaidy "Ult aqparat" oblystyq sottyń baspasóz qyzmetine silteme jasap.
Vedomstvonyń málimetinshe, eki politsiia qyzmetkeriniń ólimine kináli Sergei Vorontsovqa qatysty qylmystyq is Aqmola oblysynyń Býrabai aýdandyq sotynda qaralady. Ol QR QK 200-baptyń 3-bóligi (iri zalal keltirgen, avtomobildi urlaý maqsatynsyz zańsyz ielený (aidap áketý)), 346-baptyń 2, 3, 6-bólikteri (kólik quralyn basqarý quqyǵynan aiyrylǵan jáne alkogoldik masań kúidegi adamnyń kólik quralyn basqarýy, abaisyzda adam densaýlyǵyna jeńil ziian keltirýge, adam densaýlyǵyna ortasha aýyrlyqtaǵy ziian keltirý jáne eki adamnyń ólimine ákep soǵý) boiynsha aiyptalyp otyr.
Aiyptaý qorytyndysyna sáikes, buryn ákimshilik, qylmystyq jaýapkershilikke tartylǵan jáne kólik quraldaryn basqarý quqyǵynan aiyrylǵan Shýchinsk qalasynyń turǵyny Sergei Vorontsov birqatar aýyr qylmystyq quqyq buzýshylyqtar jasady. Atap aitqanda, 2020 jyldyń qazan aiynda S.Vorontsov anasynyń kóligin aidap áketken, sodan keiin osy avtokólikpen Shýchinsk qalasynda mas kúiinde, tyiym salatyn signalǵa qaramastan qatty jyldamdyqpen júitkigen boiy baǵdarshamnyń baǵanyn soqqan.
Vorontsovtyń kinásinen oryn alǵan jol-kólik oqiǵasynyń saldarynan sol jerde eki adam kóz jumdy, taǵy eki adam túrli dárejede jaraqat alyp, aýrýhanaǵa jetkizildi. Al, avtokólikterge aitarlyqtai zaqym kelip, jaramsyz bolyp qaldy.
«Osy qylmystyq is boiynsha sot otyrysy 2021 jylǵy 25 qańtarda Býrabai aýdandyq sotynda saǵat 15.00-ge taǵaiyndaldy», - dedi vedomstvodan.
