Foto: Ashyq derekkóz
Prokýratýra, ulttyq qaýipsizdik, ishki ister jáne tótenshe jaǵdailar organdarynyń jaýapty qyzmetkerleri reseilik "Krokýs Siti Holdaǵy" teraktiden keiin azamattardyń qaýipsizdigin qamtamasyz etý boiynsha atqarǵan jumystarynyń aralyq nátijesin bólisti, dep habarlaidy «Ult aqparat» Bas prokýratýranyń baspasóz qyzmetine silteme jasap.
Bas prokýrordyń orynbasary Jandos Ómiráliev atqarylǵan jumystar týraly baiandamalardy, ózara is-qimyldy jaqsartý, aqparat almasý jáne túrli qaýip-qaterlerge den qoiý sharalary, zańnamany jetildirý boiynsha usynystardy tyńdady.
Keńeste 2000-ǵa jýyq iri saýda oiyn-saýyq ortalyǵy men basqa da adamdar kóp jinalatyn obektiler tekserilgeni belgili boldy. Bul obektilerdiń ieleri men qaýipsizdik qyzmetteri terakt qaýpi tóngen jaǵdaida áreket etýdiń jańa tásilderin úirengen.
Ómiráliev bul máseleni turaqty baqylaýda ustaýdy, adamdar kóp jinalatyn oryndarda zamanaýi tsifrlyq sheshimder men beinebaqylaý júielerin qoldanýdy, kez kelgen qoǵamdyq tártipti buzýdyń jolyn shuǵyl túrde kesýdi tapsyrdy.
Esterińizge sala keteiik, Máskeý túbindegi "Krokýs Siti Holdaǵy" qaiǵyly oqiǵadan keiin saýda jáne oiyn-saýyq ortalyqtary men basqa da adamdar kóp jinalatyn oryndar tekserile bastady.
Mundai oryndarǵa saýda oiyn-saýyq ortalyqtary, mádeniet (teatrlar, kontserttik jáne kinozaldar, mýzeiler), bilim berý (mektepter, joǵary oqý oryndary), densaýlyq saqtaý (emhanalar, aýrýhanalar), qoǵamdyq tamaqtaný (meiramhanalar, kafeler, ashanalar), dene shynyqtyrý-caýyqtyrý jáne sporttyq ǵimarattary (stadiondar, trenajer zaldary), týristerdi ornalastyrý oryndary (qonaq úiler, otelder), ǵibadat úileri jáne t.b. jatady.
