"Zerde" holdinginiń taratylýy jelide jazyp jatqandai tulǵaaralyq janjal emes. Bul týraly Tsifrlyq damý ministrliginiń baspasóz hatshysy Erhan Tátken málimdedi, - dep habarlaidy Tengrinews.kz agenttigi.
Baspasóz hatshysy Facebook-paraqshasynda "Zerde" holdinginiń taratylýyna qatysty Jelide taraǵan aqparattarǵa pikir bildirdi.
"Zerde" holdingi qyzmetin odan ári jalǵastyrý nemese jalǵastyrmaý máselesi Esep komiteti anyqtaǵan olqylyqtardan keiin nazarǵa iligip otyr.
Holdingti taratý barysynda qyzmetkerlerdi jumysqa ornalastyrýǵa járdem kórsetiledi, sondai-aq olarǵa zańnama sheńberinde qajetti ótemaqy beriledi. Ministrlik qazir osy másele boiynsha jumys istep jatyr jáne jaǵdaidy erekshe baqylaýda ustap otyr", - dedi Erhan Tátken.
Ol bul protsesti jeke bas máselesine qatysty dep kórsetý jáne ministrdi "Zerde" holdinginiń basshylyǵyna qarsy qoiý durys emes ekenin aitty.
"Holdingtiń taratylýy keibir internet-paidalanýshylar atap kórsetip jatqandai, eki basshy arasyndaǵy túsinispeýshilik emes", - dedi ol.
Sondai-aq, ol holding júrgizgen aýdit nátijelerine qatysty másele shette qalmaitynyn aitty.
"Barlyq qajetti tekserý is-sharalary, onyń ishinde ony taratýǵa qatysty sharalar zańnamaǵa sáikes júrgiziledi.
Sózimniń sońynda, qurmetti BAQ ókilderi! Resmi, shynaiy aqparat alý úshin Sizder árqashan ministrliktiń baspasóz qyzmetine jáne jeke ózime júgine alasyzdar", - dep túiindedi baspasóz hatshysy.
