Almatyda kisi ólimi bolǵan jol apatyna kináli 59 jastaǵy áiel sottaldy, dep habarlaidy "Ult aqparat".
Jol apaty 2019 jyly 15 qyrkúiekte Almaty qalasynyń Bostandyq aýdanynda bolǵan. «Toyota Land Cruiser Prado» kóligin júrgizgen áiel «jol berińiz» degen belgini elemei, burylystan ótken. Al oǵan qarsy baǵytta kele jatqan «Lexus GX-300» avtokóligi der kezinde toqtai almai, soqtyǵysqan. Qóliktiń biri sol ekpinimen Rozybakiev kóshesiniń boiynda turǵan tórt jaiaý júrginshini qaqqan.
«Sot tergeýinde belgili bolǵandai, jaiaý júrginshiniń biri – 1992 jyly týǵan K. esimdi azamat jaraqattan oqiǵa ornynda qaitys boldy. Ekinshisi – 1994 jyly týǵan A. esimdi azamat aýrýhanada kóz jumady. Basqa zardap shekkender meditsinalyq mekemelerdiń birinde uzaq ýaqyt em alǵan», - deidi Almaty qalalyq Politsiia departamenti bastyǵynyń orynbasary Rústem Ábdrahmanov.
Sotqa deiingi tergeý Qylmystyq kodekstiń 345-baby 4-bóligine sáikes qylmystyq quqyq buzýshylyq belgileri boiynsha júrgizildi. Tergeý men saraptamalyq zertteýler kúdikti S.Tanikeevanyń kinásin dáleldedi.
Almaty qalasynyń Bostandyq aýdandyq soty ony eki adamnyń ólimine ákep soqqan jol-kólik oqiǵasyna kináli dep tanydy. Ol bes jylǵa bas bostandyǵynan aiyryldy.
