«Egemen Qazaqstan» gazeti qai dáýirde, qandai formatsiiada qyzmet etse de, ult múddesiniń joqtaýshysy bolyp keledi. Mundai pikirdi elimizdiń bas basylymnyń 100 jyldyq mereitoiyna arnalǵan saltanatty sharada QR Memlekettik hatshysy Qyrymbek Kósherbaev bildirdi, dep habarlaidy QazAqparat.
«Búgin - qazaq jýrnalistikasy tarihynda erekshe kún. Óitkeni, elimizdiń bas basylymy «Egemen Qazaqstan» respýblikalyq gazetiniń 100 jyldyq mereitoiy tutastai ulttyq rýhaniiatymyz úshin tolaǵai beles, torqaly mereke. Iá, osydan bir ǵasyrdan astam ýaqyt buryn Ahmet Baitursynulynyń «Gazet - halyqtyń kózi, qulaǵy hám tili» degen sózi búgingi tańda da, aqparat zamanynda da óziniń ózektiligin joimai keledi. Alǵash ret 1919 jyly Orynbar qalasynda jaryqqa shyqqan ata basylym búginde elimizdiń ǵasyrlyq jylnamasyna ainaldy. Basylym betterin paraqtaǵanda ultymyzdyń ǵasyr ishinde bastan keshirgen kezeńderi kóz aldyńyzǵa kelip, 20-shy jyldardaǵy ujymdastyrý, 30-shy jyldardaǵy asharshylyq pen repressiialar, ekinshi dúniejúzilik soǵys jyldary, tyń igerý jáne basda da taǵdyrly ári tarihi oqiǵalarmen órilip, azattyqtyń aq tańyndaǵy aqjoltai jańalyqtarmen arnasy jalǵasady», - dedi ol.
Memlekettik hatshy zamana únine ainalǵan bas gazet ár jyldary respýblikamyzdyń astanasy bolǵan Qyzylorda, Almaty qalalarynda jumysyn jalǵastyryp, el ómirindegi órkendi isterdi oqyrmandarǵa der kezinde jetkizip otyrǵanyn aitty.
«Gazet jýrnalisteri qai kezde de halyqtyń qoǵamdyq-saiasi, áleýmettik-ekonomikalyq, mádeni-rýhani taqyryptardaǵy qadaý-qadaý problemalaryn qaýzap, igilikti iske janashyrlyqpen ún qosty. Keleli máselelerdiń kesimdi sheshim tabýyna kásibi sheberlikpen atsalysty... Eń bastysy «Egemen Qazaqstan» gazeti qai dáýirde, qandai formatsiiada qyzmet etse de, ult múddesiniń joqtaýshysy, qazaq rýhaniiatynyń izdeýshisi, tól mádenietimizdiń janashyry bolyp keledi», - dedi Qyrymbek Kósherbaev.
Sóz sońynda Memlekettik hatshy mereitoiǵa orai Qazaqstan Prezidenti Qasym-Jomart Toqaevtyń alǵys hattaryn «Egemen Qazaqstan» gazetiniń basqarma tóraǵasy Darhan Qydyrálige, basqarma tóraǵasynyń orynbasary Erbolat Qamenge, bas redaktordyń orynbasary Talǵat Batyrhanǵa, saiasat bóliminiń meńgerýshisi Joldybai Bazarǵa jáne basylymnyń aǵa redaktory Zabira Tóleshovaǵa tabystady.
Saltanatty sharada Májilis depýtat Qýanysh Sultanov sóz sóilep, elimizdiń buqaralyq aqparat quraldary ishinde «Egemen Qazaqstan» gazeti erekshe orynǵa ie ekendigin basa aitty.
«Memlekettik táýelsizdigimizdiń arqasynda kelgen rýh bostandyǵynyń baǵasy ólsheýsiz ekendigin nasihattaýda gazet eńbegi orasan. Bastysy, «Egemen Qazaqstan» óziniń 100 jyldyq tarihynyń sońǵy 30 jylynda buryn-sońdy bolmaǵan jańa dáýir jaqsylyqtaryn jariialaýda shyǵarmashylyq ónegesin kórsetip, oqyrmanynyń yqlasyna keneldi», - degen Qýanysh Sultanov basylym basshylyǵyna Májilis tóraǵasy Nurlan Nyǵmatýlinniń arnaiy quttyqtaýyn tabys etti.
Sondai-aq gazetti mereitoiymen QR Parlamenti Senatynyń tóraǵasy Dariǵa Nazarbaeva quttyqtady. Spikerdiń quttyqtaýyn Senat depýtaty Nurtóre Júsip oqyp berdi.
«Elimizdiń bas basylymy «Egemen Qazaqstan» gazetiniń qyzmetkerleri men oqyrmandaryn gazettiń 100 jyldyq mereitoiymen quttyqtaimyn. Basylymnyń ár sany, ár maqalasy halqymyzdyń tynys-tirshiligin aiqyn kórsetip, memlekettik baǵdarlamalar men reformalardyń mańyzyn qalyń kópshilikke der kezinde ári sapaly jetkizýge atsalysyp keledi. Ǵasyrlyq shejiresi bar gazetti oiy tushymdy, qalamy qarymdy, jazǵany jalyndy jýrnalisterdiń ordasy deýge bolady. Sebebi sizder bilik pen buqara arasyndaǵy altyn kópir bolyp, tynymsyz eńbektiń arqasynda oqyrmannyń oń baǵasyn alyp kelesizder», - dep atap ótedi Senat spikeri.
Sonymen qatar Dariǵa Nazarbaeva búgingi ujymnyń tolaiym tabystary sol beinetti eńbek jolyndaǵy jetistikteri dep biletindigine basa nazar aýdarady.
«Elimizdiń saiasi, ekonomikalyq, áleýmettik jáne rýhani jetistikterin jurtshylyqqa jetkizýdegi eńbekterińizge shyǵarmashylyq tabys, otbasylaryńyzǵa amandyq, baqyt pen bereke tileimin», - dep aiaqtaidy quttyqtaýyn tóraǵa.
.jpeg)