Ótken demalysta Temirtaý qalasynyń kópbeiindi ana men bala ortalyǵynda náreste mert boldy. Bosanǵan áieldiń aitýynsha, meditsinalyq kómek ýaqytyly kórsetilmegendikten, ol turyp bosanǵan, sodan náreste edenge qulaǵan. Áiel qyzynyń ólimine meditsina qyzmetkerleriniń kináli ekenin dáleldeýge nietti, - dep habarlaidy Tengrinews.kz.
33 jastaǵy Aijan Shahmanova Kópbeiindi analar men balalar ortalyǵyna 19 aqpanda túsken. Áiel júktiliginiń 40-shy aptasynda edi. Bul Aijannyń úshinshi nárestesi. Onyń úlken balalary 12 jáne 11 jasta.
"Sábiimizdi asyǵa kúttik, ony Aisha dep ataǵymyz keldi. Men aýrýhanaǵa shamamen 23.30-da tústim. Qabyldaý kezinde bári jaqsy boldy, júrek soǵysy qalypty, tolǵaq ortasha, ár bes minýt saiyn. Maǵan tańǵa jaqyn bosanatynymdy aitty. Shamamen 01.50-de tolǵaq jiilei tústi. Qaitadan uryqqa kardiotokografiia jasady, sábidiń júrek soǵysyn tyńdady, oryndyqta tekserdi. Sol kezde bosanatynymdy aityp aiǵailaǵan edim. Biraq olar tekserýden ótip jatqan basqa áieldermen birge bosaný zalyna aparatynyn aitty. Men tolǵaq bastaldy dep aiǵailadym, biraq meni tyńdaǵan adam joq, elemedi", - dedi Aijan.
Liftide áielden qaǵanaq sýy ketken. Bosaný bólmesine de ózi barýǵa májbúr bolǵanyn aitty. Bólmege kire bergende taǵy da tolǵaq qysyp, tósekke jarty metr qalǵanda bosanyp qoiǵan.
"Tolǵaq bastalǵanda bosanaiyn dep jatqanymdy aityp aiǵailadym. Endi tósekke qolym tie bergende ishimnen náreste shyǵyp, edenge qulap tústi. Odan ári linoleýmmen taǵy jarty metrge domalap ketti... Janymdaǵy mamandar, shamamen 5-7 adam: "Ne istep jatyrsyz, ne istep jatyrsyz?" dep jatyr... Men kim kimge ne aityp jatqanyn túsinbedim... Meditsina qyzmetkerleri qobalji bastady, bala eshqandai dybys shyǵarmady. Kindik kesilmedi, ol menen ajyrap ketti", - deidi Aijan.
Odan ári Aijannan qan kete bastap, anesteziia salynǵan. Ol oianǵanda telefon berilmei qoiǵanyn aitty. Tańerteń ǵana uialy telefonyn alyp, 102 nómirine qońyraý shalǵan. Bosanǵan áieldiń aitýynsha, politsiia qyzmetkerleri balanyń ólimi týraly dárigerlerden emes, odan bilgen.
"Perzenthana bala ólgenin politsiiaǵa habarlamaǵan. Qyzmetkerdi de men jatqan reanimatsiiaǵa ótkizgisi kelmedi. Men bolǵan oqiǵaǵa kináli árbir meditsina qyzmetkeri jazalanǵanyn qalaimyn. Óitkeni eshqandai patologiia bolǵan joq, toǵyz ai qyzymdy kóterip, kúttim, armandadym", - deidi áiel.
Temirtaý qalasynyń Kópsalaly ana men bala ortalyǵy atalǵan derek boiynsha qazirgi ýaqytta qyzmettik tergeý júrip jatqanyn habarlady. Qaraǵandy oblysynyń Densaýlyq saqtaý basqarmasy ókili óńirlik Meditsinalyq jáne farmatsevtikalyq baqylaý departamenti tarapynan tekserý júrgizýge bastama jasaitynyn atap ótti.
Qaraǵandy oblysy politsiia departamentiniń baspasóz qyzmeti de jaǵdaiǵa túsinik berdi.
"Bul derek politsiiada tirkeldi. Qajetti saraptamalar taǵaiyndaldy. Tergeý júrip jatyr", - dedi vedomstvo ókilderi.
