Eýraziialyq ekonomikalyq odaqqa múshe memleketterdiń Úkimet basshylary Belarýs elinde kezdesedi. Bul týraly búgin QR Syrtqy ister ministrliginiń resmi ókili Aibek Smadiiarov aitty, dep habarlaidy QazAqparat tilshisi.
«27 qarashada Minsk qalasynda Úkimet basshylary deńgeiinde Eýraziialyq úkimetaralyq keńestiń kezekti otyrysy ótedi. Otyrystyń kún tártibi shaǵyn jáne keńeitilgen quramda qaralatyn 23 tarmaqty qamtidy. Otyrys barysynda Eýraziialyq ekonomikalyq odaǵy aiasyndaǵy integratsiialyq ózara is-qimyldyń birqatar kókeikesti máselesi qaralmaq. Úkimet basshylary qol jetken ýaǵdalastyqtardyń aralyq nátijelerin qorytyndylap, EAEO-nyń odan ári jumys baǵyttaryn belgileidi», - dedi ol.
Sonymen qatar onyń aitýynsha, saýda-ekonomikalyq yntymaqtastyq pen múshe memleketter arasyndaǵy ózara saýdany keńeitý, ishki naryqtyń jumys isteýine kedergi keltiretin tosqaýyldardy joiý, sondai-aq ekonomikanyń jekelegen salalaryndaǵy integratsiialyq áleýetin damytý máselelerine erekshe nazar aýdarylady.
Úkimetaralyq keńestiń músheleri Joǵary Eýraziialyq ekonomikalyq keńes sheshimderiniń jobalaryn, Eýraziialyq jobanyń 25 jyldyǵy men EAEO týraly sharttyń 5 jyldyǵyn toilaý jónindegi is-sharalardyń baǵdarlamalaryn, sondai-aq elektr qozǵaltqyshy bar kólik quraldary óndirisin qamtamasyz etý men yntalandyrý jáne qoldaný jónindegi is-sharalar baǵdarlamasyn bekitetini josparlanǵan.
«Úkimet basshylary ózara saýdadaǵy tosqaýyldardy joiýǵa, tariftik jeńildikterdi qoldanýǵa qatysty tapsyrmalardy iske asyrý barysyn qaraýǵa erekshe nazar aýdarady», - dedi Aibek Smadiiarov.
