EAEO men Qytai arasynda táýelsiz halyqaralyq qarjy-valiýta júiesin qurý máselesi qaralyp jatqan joq. Bul týraly premer-ministr orynbasary, saýda jáne integratsiia ministri Baqyt Sultanov málimdedi, dep habarlaidy Sputnik Qazaqstan.
Keshe, 14 naýryzda Eýraziia ekonomikalyq komissiiasynyń resmi saitynda EAEO men Qytai táýelsiz halyqaralyq valiýta-qarjy júiesiniń jobasyn ázirleidi degen aqparat jariialandy. Keiin jańalyq óshirildi, biraq buqaralyq aqparat quraldary taratyp úlgerdi.
Búgin, 15 naýryz úkimet kýlýarynda saýda ministri Baqyt Sultanov kún tártibinde mundai másele joq ekenin málimdedi.
"17-18 naýryzda Máskeýde Eýraziialyq ekonomikalyq komissiia keńesiniń otyrysy josparlanǵan. Men komissiia múshesimin. Qazir kún tártibinde bul másele turǵan joq", - dedi ministr tilshilerge.
Sultanov sanktsiialarǵa bailanysty esep aiyrýda qiyndyqtar bar ekenin moiyndady.
"Bizdiń elder arasynda, mysaly, dollarmen esepteskende qiyndyqtar bar. Óitkeni olardy Reseige kirgizýge tyiym salynǵan. Sondyqtan, ózara esep aiyrysýǵa qatysty, ásirese bizneste, konsýltatsiialar ótedi, máseleler talqylanady. Biraq siz aitqan másele (táýelsiz halyqaralyq valiýta) kún tártibinde turǵan joq", dedi ministr.
